વડોદરામાં MD ડ્રગ્સ સપ્લાય કરનાર સુરતનો સાજીદ ચીનો ઝડપાયો

વડોદરાઃ વડોદરામાં ગુજસીટોકના ગુનામાં જામીન પર છૂટી ડ્રગ્સ વેચતા પકડાયેલા કાસમઆલા ગેંગના સાગરીત સાહિદ ભૂરીયા પાસે મળેલા એમડી ડ્રગ્સના સપ્લાયરને સુરતથી દબોચી લેવામાં આવ્યો છે.

હુજરત ટેકરા ખાતે રહેતા સાહિદ શેખ પાસેથી ક્રાઇમ બ્રાન્ચે એમડી ડ્રગ્સ પકડતાં પૂછપરછ દરમિયાન તેણે દસ દિવસ પહેલાં ૨૦ ગ્રામ એમડી ડ્રગ્સ(રૃ.૬૦ હજાર) સુરતના સાજીદ પટેલ પાસેથી લીધું હોવાની માહિતી બહાર આવી હતી.

જેથી વડોદરા પોલીસે સુરત ક્રાઇમ બ્રાન્ચની મદદ લઇ આરોપીને સાથે રાખી કોસાડ વિસ્તારમાંથી સાજીદ ઉર્ફે ચીનો એહમદભાઇ પટેલ(બિસ્મીલ્લાહ એપાર્ટમેન્ટ, કોસાડ આવાસ,અમરોલી,સુરત) ને ઝડપી પાડયો હતો. 

સાજીદ વડોદરામાં બીજા કોને કોને ડ્રગ્સ આપતો હતો અને તે કોની પાસેથી ડ્રગ્સ મેળવતો હતો તેની તપાસ માટે પોલીસે એક દિવસના રિમાન્ડ મેળવ્યા છે.જો કે ડ્રગ્સના મોટાભાગના કેસોમાં પોલીસ દ્વારા ટોપના ડ્રગ્સ સપ્લાયરો સુધી પહોંચી શકતી નહિ હોવાનું જણાઇ આવ્યું છે.

સાજીદ સામે સુરતમાં પાંચ ગુના

વડોદરા પોલીસે ડ્રગ્સ મોકલનાર સુરતના સાજીદ પટેલના ગુનાઓને લગતી વિગતો તપાસતાં તેની સામે હથિયારબંધી, જુગાર,રસ્તા પર અડચણ ઉભી કરવી જેવા પાંચ કેસ નોંધાયા હોવાની માહિતી જાણવા મળી છે.