રાણપુરના અળવ ગામે છરીની અણીએ રૂ.10 હજારની લૂંટ

ખિસ્સામાં જે પૈસા હોય તે આપી દે, આ છરી સગી નહી થાય

અળવ ગામના આશ્રમમાં બે શખ્સો આવી રૂપિયા લૂંટી ધમકી આપ્યાની ફરિયાદ રાણપુર પોલીસ મથકમાં નોંધાઈ

ભાવનગર : બોટાદ જિલ્લાના રાણપુર તાલુકાના અળવ ગામના આશ્રમમાં છરીની અણીએ બે શખ્સોએ આધેડ સાથે લૂંટ આચરી છે. બાઈક પર આવેલા બે શખ્સો આધેડને છરી બતાવી રૂ.૧૦ હજારની લૂંટ કરી નાસી છૂટયા હતા. બનાવ અંગે રાણપુર પોલીસ મથકમાં ગુનો નોંધાતા પોલીસે આગળની તપાસ હાથ ધરી છે.

ૂબોટાદના પાંચપડા વિસ્તાર શિવાજીનગર ખાતે રહેતા પ્રકાશભાઈ સામતભાઈ રાજગોરે રાણપુર પોલીસ મથકમાં પ્રતાપ ઉર્ફે પતુ જોરૂભાઈ ચાવડા (રહે.અળઉ, તા.રાણપુર) અને અજાણ્યા શખ્સ વિરૂદ્ધ ફરિયાદ નોંધાવી હતી. જેમાં અળવ ગામની સીમમાં પરબવાળી ખોડીયાર માતાના મંદિરના પુજારીની તબિયત સારી નહી હોવાથી તેઓ તેમના ખબર અંતર પુછવા માટે ગયા હતા. જ્યાં તેઓ બેઠા હતા ત્યારે ઉક્ત પ્રતાપભાઈ અને અજાણ્યો શખ્સ બાઈક પર આવી કમરના ભાગેથી છરી કાઢી છરી મારવાનો પ્રયાસ કરી છરી તેમના પેટના ભાગે રાખી તારી પાસે ખીચામાં જે હોય તે કાઢીને મને આપી દે નહીતર તને મારી નાખીશ, આ છરી કોઈની સગી નહી થાય તેમ કહી ધમકી આપતા તેમણે ખિસ્સામાં રહેલા દુધના હિસાબના રૂ.૧૦ હજાર તેને આપી દેતા ઉક્ત બન્ને શખ્સો રૂપિયા લઈને નાસી છૂટયા હતા. બનાવ અંગે રાણપુર પોલીસે ગુનો નોંધી આગળની તપાસ હાથ ધરી છે.