Rain In Amreli : ગુજરાતના મોટાભાગના વિસ્તારોમાં હવામાન વિભાગે ગાજવીજ સાથે હળવાથી મધ્યમ વરસાદની આગાહી કરી છે, ત્યારે આજે રવિવારે (14 સપ્ટેમ્બર) અસહ્ય ગરમી અને બફારા બાદ અમરેલી જિલ્લામાં સતત ત્રીજા દિવસે મેઘમહેર યથાવત છે. ભાદરવા મહિનામાં પડેલા આ અનરાધાર વરસાદથી ખેડૂતોમાં ખુશીનો માહોલ છવાયો છે. જ્યારે શહેરના નીચાણવાળા વિસ્તારોમાં પાણી ભરાતા નગરપાલિકાની પ્રી-મોન્સૂન કામગીરી સામે અનેક સવાલો ઊભા થયા છે.
જરૂરિયાતના સમયે વરસાદ, ખેડૂતો ખુશખુશાલ
જિલ્લાના જાફરાબાદ, સાવરકુંડલા, ખાંભા અને આસપાસના ગ્રામ્ય વિસ્તારોમાં વીજળીના કડાકા-ભડાકા સાથે વરસાદ ખાબક્યો હતો. જાફરાબાદના નાગેશ્રી, મીઠાપુર, દુધાળા સહિતના ગ્રામ્ય વિસ્તારોમાં વરસાદ પડ્યો હતો. ખાંભા પંથકમાં પણ ધીમીધારે મેઘમહેર જોવા મળી છે.
આ વરસાદ કપાસ, મગફળી, ડુંગળી, બાજરી, કઠોળ, એરંડા, મગ, અડદ, જુવાર અને મકાઈ સહિતના ઊભા પાક માટે જીવતદાન સમાન સાબિત થયો છે. પાકને જરૂરિયાતના સમયે જ વરસાદ મળતા ખેડૂતોની આતુરતાનો અંત આવ્યો છે અને તેઓ રાહત અનુભવી રહ્યા છે.
શહેરી વિસ્તારોમાં જળબંબાકાર
અમરેલી શહેરમાં પણ આજે બપોર બાદ ધોધમાર વરસાદ વરસ્યો હતો. જેમાં રાજકમલ ચોક, હીરા મોતી ચોક, બસ સ્ટેન્ડ વિસ્તાર, હરિરોડ, ભીડભંજન, તેમજ નિચાણવાળા વિસ્તાર જેવા કે જીવરાજ મહેતા ચોકમાં પાણી ભરાઈ ગયા હતા. ભારે વરસાદના કારણે રસ્તાઓ પર પાણી ફરી વળ્યા હતા.
હવામાન વિભાગની આગાહી બાદ અમરેલી શહેર ઉપરાંત સાવરકુંડલા, બાયપાસ, ચક્કરગઢ રોડ, લીલીયા રોડ અને બહારપરા જેવા વિસ્તારોમાં પણ ધોધમાર વરસાદ પડ્યો હતો. નગરપાલિકાની પ્રી-મોન્સૂન કામગીરીની પોલ ખુલી જતાં, સ્થાનિક લોકોમાં ભારે રોષ જોવા મળ્યો છે.
