ડુમસ સી ફેઝ ડેવલપમેન્ટ પ્રોજેક્ટની કામગીરીમાં વાયુ પ્રદુષણની ગાઈડ લાઈનનો અમલ ન કરનારને દંડ

Surat : દેશના દિલ્હી અને મુંબઈ જેવા શહેરોમાં વાયુ પ્રદૂષણની માત્રામાં અધધ વધારો થયો છે. આ શહેરના હાલ જોઈ સુરત પાલિકાએ પાણી પહેલા પાળ બાંધી છે. સુરત પાલિકાએ બાંધકામ કરતી સાઈડ પર થતા પ્રદૂષણ રોકવા માટે કેટલાક નિયમોનો ભંગ કરતા ખાનગી બિલ્ડર પાસેથી પાલિકાએ દંડ વસૂલ કર્યો હતો. ત્યારબાદ આજે પાલિકાના મહત્વકાંક્ષી એવા ડુમસ સી ફેઝ ડેવલપમેન્ટ પ્રોજેક્ટમાં પણ પ્રદૂષણ અટકાવવા નિયમોનું પાલન ન થતું હોય કોન્ટ્રાક્ટરને પાંચ લાખ રૂપિયાનો દંડ ફટકારવામાં આવ્યો છે. 

બાંધકામ સાઈટ પરથી ધૂલકણ, સિમેન્ટની રજકણ ઉડે નહીં તે માટે વિશેષ ગાઈડલાઈન જાહેર કરવામાં આવી છે. તેમાં ગ્રીન નેટ, વગર બાંધકામ થતું હોવા સાથે બાંધકામ દરમિયાન વાહનો પસાર થાય ત્યારે ધૂળ ન ઉડે તે માટે ગ્રાઉન્ડમાં પાણીનો છંટકાવ કરવાનો રહે છે. આ ઉપરાંત અન્ય ગાઈડલાઈન જાહેર કરવામાં આવી છે. ગત સપ્તાહમાં પાલિકાના અધિકારીઓએ ખાનગી બાંધકામ સાઈટની મુલાકાત લીધી હતી અને ખામી બદલ દંડ ફટકાર્યો હતો. પાલિકાએ આ અભિયાન શરૂ કર્યું તેમાં 184 બાંધકામમાં આ ખામી જોવા મળી હતી જેમની પાસેથી 56 લાખ જેટલો દંડ વસુલ કરવામાં આવ્યો છે. 

સુરત પાલિકાના મહત્વકાંક્ષી પ્રોજેક્ટની માહિતી લેવા માટે મ્યુનિ. કમિશનર શાલિની અગ્રવાલ અને અધિકારીઓની ટીમ પહોંચી હતી. મ્યુનિ. કમિશનર અને ટીમ જ્યારે સાઈટ પર નિરીક્ષણ કરી રહી હતી. ત્યારે કામગીરી સાથે સંકળાયેલી એક ટ્રક બહાર નીકળી હતી. આ ટ્રક પસાર થવાની હોય ત્યારે ધૂળ ન ઉડે તે માટે પાણીનો છંટકાવ કરવાનો હોય છે પરંતુ તે ન કરાતા ધુળની ડમરીઓ ઉડી હતી. આ દ્રશ્ય જોતાની સાથે જ મ્યુનિ. કમિશનરે પ્રદૂષણની માત્રા રોકવા માટે પગલાં ન ભર્યા હોવાથી કોન્ટ્રાક્ટર સામે શિક્ષાત્મક કાર્યવાહી કરવા આદેશ કર્યો હતો. મ્યુનિ. તંત્રએ કોન્ટ્રાક્ટરને પાંચ લાખ રૂપિયાનો દંડ ફટકાર્યો છે.