શ્રાવણ માસમાં શહેરા નજીક જમીનમાંથી મળી આવ્યું શિવલિંગ, વાયુવેગે વાત ફેલાતા શ્રદ્ધાળુઓ ઉમટ્યા

Panchmahal News : પંચમહાલ જિલ્લાના શહેરામાં શ્રાવણ મહિનાના પવિત્ર દિવસોમાં એક અનોખી ઘટના બની છે. અહીંના પ્રખ્યાત મરડેશ્વર મહાદેવ મંદિરની નજીક આવેલી એક જમીનમાંથી શિવલિંગ મળી આવ્યું છે. ઝાડી-ઝાંખરા વચ્ચેથી શિવલિંગ દેખાતા જમીન માલિક અને આસપાસના લોકોમાં આશ્ચર્ય અને શ્રદ્ધાની લાગણી જન્મી છે.

આ ઘટનાની જાણ થતા જ સ્થાનિક લોકોએ શિવલિંગની પૂજા-અર્ચના કરી. દેવાધિદેવ મહાદેવનું શિવલિંગ જમીનમાંથી પ્રગટ થયું હોવાની વાત વાયુવેગે શહેરા અને આસપાસના વિસ્તારોમાં ફેલાઈ ગઈ. જેને પગલે, મોટી સંખ્યામાં શ્રદ્ધાળુઓ આ સ્થળે દર્શન કરવા માટે ઉમટી પડ્યા છે. લોકો શિવલિંગની પૂજા કરી રહ્યા છે, ભજનો ગાઈ રહ્યા છે અને આસ્થાના આ માહોલમાં લીન થઈ રહ્યા છે. સ્થાનિક પ્રશાસન અને મંદિર સમિતિ દ્વારા પણ આ સ્થળની દેખરેખ રાખવામાં આવી રહી છે.

આ બાબતે કોઈ અંધશ્રદ્ધા ન ફેલાય તે માટે લોકોમાં જાગૃતિ લાવવાની જરૂર છે, પરંતુ આ ઘટના શ્રદ્ધાળુઓ માટે આસ્થાનું કેન્દ્ર બની છે અને શ્રાવણ માસમાં મહાદેવના દર્શનનો લહાવો લેવા લોકો અહીં આવી રહ્યા છે.

જ્યાંથી આ શિવલિંગ મળી આવ્યું છે તે સ્થળ મરડેશ્વર મહાદેવ મંદિરની અત્યંત નજીક આવેલું છે, જેનું એક વિશેષ મહત્ત્વ છે. સ્થાનિક લોકોમાં એવી શ્રદ્ધા છે કે આ સંભવતઃ પ્રાચીન મરડેશ્વર મહાદેવ મંદિરના વિશાળ પરિસરનો જ એક ભાગ હોઈ શકે છે. તેમનું માનવું છે કે વર્ષો પહેલાં આ પરિસરમાં અન્ય નાનાં-મોટાં શિવમંદિરો પણ અસ્તિત્વમાં હશે, જે કાળક્રમે ધરતીમાં સમાઈ ગયા હશે. આ શિવલિંગનું પ્રગટ થવું એ પ્રાચીન ધાર્મિક અવશેષોના પુનરાગમન સમાન હોઈ શકે છે.