હરણી-વારસિયા રિંગ રોડ પર વેપારી પર હુમલો કરી આંખમાં મરચાની ભૂકી નાખી રોકડા ૧૦ લાખની લૂંટ

વડોદરા,રાત્રે દુકાન બંધ કરીને ઘરે આવતા વેપારી ઘર પાસે કારમાંથી ઉતર્યા ત્યારે જ બુકાનીધારી ચાર લૂંટારાઓએ તેમના પર હુમલો કરી આંખમા મરચાની ભૂકી નાખી ૧૦ લાખ રોકડા ભરેલી બેગની લૂંટ ચલાવી હતી. જે અંગે વારસિયા પોલીસે ગુનો દાખલ કરી વધુ તપાસ હાથ ધરી છે.

 હરણી-વારસિયા રિંગરોડ પર ચતુરભાઈ પાર્ક સોસાયટીમાં રહેતા અને કારેલીબાગમાં ગિફ્ટ શોપ ચલાવતા વેપારી  લીલારામ લાડકમલ રેવાણીએ વારસિયા પોલીસ સ્ટેશનમાં ફરિયાદ નોંધાવી જણાવ્યું છે કે, ગઈકાલે સવારે ૧૧ વાગ્યે  હું ઘરેથી કાર લઈને મારી દુકાને ગયો હતો .  રાત્રે સાડા આઠ વાગ્યે  દુકાન બંધ કરી મારા ઘરે આવવા માટે કાર લઈને ભૂંતડીઝાંપા ગ્રાઉન્ડથી ફતેપુરા ચાર રસ્તા થઈ આવતો હતો. ચતુરભાઈ પાર્ક સોસાયટી સોની એપાર્ટમેન્ટની બાજુમાં ઘર પાસે હું કારમાંથી ઉતરવા જતો હતો. તે સમયે  એક મોપેડ અને બાઈક પર ચાર છોકરાઓ માંેઢે કાળું કપડું બાંધીને આવ્યા હતા. એક છોકરાએ મારી ફંેટ પકડી છાતીના ભાગી મુક્કા માર્યા હતા અને બીજાએ મારી આંખમાં મરચાની ભૂકી નાખી દીધી હતી. બીજા આરોપીઓ ગાડીમાં પાછળની સીટ પર મૂકેલી મારી હેન્ડબેગ અને નાસ્તાની થેલીઓ લઈને ભાગ્યા હતા. આરોપીઓએ નાસ્તાની થેલીઓ રોડ પર ફેંકી દીધી હતી. મારા હેન્ડબેગ લઇને ભાગ્યા હતા. જેમાં વકરાના ૧૦ લાખ રોકડા રૃપિયા હતા. મેં બૂમાબૂમ કરી ભાગી રહેલા આરોપીઓનો પીછો કર્યો હતો. ચાર પૈકીના એક આરોપીને મેં પકડી લીધો હતો. દરમિયાન આજુબાજુના લોકો ભેગા થઈ ગયા હતા. પોલીસને ફોન કરતા પોલીસ પહોંચી ગઇ હતી. વારસિયા પોલીસે પકડાયેલા આરોપીનો કબજો લઇ અન્ય આરોપીઓની શોધખોળ  હાથ ધરી છે.

મોેેપેડ ચાલુ નહીં થતા એક આરોપી સ્થળ પરથી જ પકડાઇ ગયો 

 વડોદરા,

ચાર આરોપીઓ લૂંટ કરીને ભાગતા હતા. તે દરમિયાન મોપેડ ચાલુ નહીં થતા મોપેડની પાછળ બેઠેલો આરોપી કૂદીને બાઇક પાછળ બેસી ગયો હતો. એક બાઇક પર ત્રણ આરોપીઓ ભાગી ગયા હતા. જ્યારે રાહુલ રમેશભાઇ મારવાડી (રહે. બાપોદ પાસે, વાઘોડિયા રોડ) ફરિયાદીના હાથે ઝડપાઇ ગયો હતો. તેની પૂછપરછ દરમિયાન અન્ય એક આરોપી અનિલ મગનભાઇ પરમાર (રહે.ખોડિયાર નગર પાસે) નું નામ ખૂલતા પોલીસે તેને ઝડપી  પાડયો છે. જ્યારે અન્ય બે આરોપીઓ હજી ફરાર છે.

સ્થળ પરથી મળેલા મોપેડની ડીકીમાંથી નંબર  પ્લેટ, પકડ અને કાગળો મળ્યા

 વડોદરા,

સ્થળ પરથી મળેલું મોપેડ પાંચ દિવસ પહેલા જ નવું લીધું હોવાની વિગતો જાણવા મળી છે. આ મોપેડની માલિકી અંગે પોલીસે તપાસ હાથ ધરી છે. મોપેડની ડીકીમાંથી નંબર પ્લેટ, પકડ અને કેટલાક કાગળો પણ મળી આવ્યા છે. આરોપીઓએ લૂંટનો પ્લાન ક્યાં અને ક્યારે ઘડયો હતો, અન્ય કોણ સામેલ  હતા, વેપારીનો  પીછો ક્યાંથી કરતા હતા, તે અંગે પોલીસે તપાસ હાથ ધરી છે.