૧૩ ડિસેમ્બરે નેશનલ લોક અદાલત: વિવિધ કેસોના સમાધાનનો મોકો

જિલ્લા કાનૂની સેવા સત્તામંડળ, વડોદરા દ્વારા તા.૧૩ ડિસેમ્બરે જિલ્લાભરમાં નેશનલ લોક અદાલતનું આયોજન કરવામાં આવશે. વડોદરા પ્રિન્સિપલ ડિસ્ટ્રિક્ટ જજની અધ્યક્ષતામાં યોજાનારી આ વર્ષની ચોથી મેગા લોક અદાલતમાં ફોજદારી સમાધાનલાયક ગુનાઓ, નેગો એક્ટ કલમ ૧૩૮, મજૂર તકરાર, ઈલેક્ટ્રિસિટી-વોટર બિલ, પરિવાર તકરાર (છૂટાછેડા સિવાય), મહેસુલ સહિતના વિવિધ નાગરિક અને દીવાની કેસોનો સમાધાનથી નિકાલ થશે. સાથે જ ટ્રાફિક પોલીસ દ્વારા જારી કરાયેલા ઈ-ચલણની ચૂકવણી માટે પણ લોકો આ લોક અદાલતનો લાભ લઈ શકશે. પક્ષકારો પોતાના કેસ લોક અદાલતમાં રજુ કરવા જિલ્લા અથવા તાલુકા કાનૂની સેવા સમિતિનો સંપર્ક કરી શકે છે.