નરોડા હિટ એન્ડ રન કેસ: ફરાર ડમ્પર ચાલકની ધરપકડ, મહિલા પોલીસકર્મી અને 108ના મહિલાકર્મીને મારી હતી ટક્કર

Naroda Hit Adn Run Case:  અમદાવાદ શહેર ક્રાઈમ બ્રાન્ચે નરોડા-હંસપુરા રીંગરોડ નજીક સોમવારે રાત્રે થયેલા હિટ એન્ડ રનના કેસમાં આરોપી ટ્રક ડ્રાઈવરની ધરપકડ કરી છે. આ અકસ્માતમાં વડાપ્રધાનની સુરક્ષામાં તૈનાત મહિલા પોલીસ કોન્સ્ટેબલ અને 108 એમ્બ્યુલન્સ સેવાના કર્મચારી સહિત બે મહિલાઓના મોત થયા હતા.

મૃતક મહિલાઓની ઓળખ વડાપ્રધાનની સુરક્ષા વ્યવસ્થા સાથે જોડાયેલા ગાંધીનગર સાયબર સેલમાં ફરજ બજાવતા વિરલબેન રબારી અને હંસપુરા 108 ઈમરજન્સી સેન્ટરના કર્મચારી હીરાલબેન રાજગોર તરીકે થઈ છે.

પોલીસના જણાવ્યા અનુસાર બંને મહિલાઓ ઈમરજન્સી સેન્ટર નજીક ઊભી હતી તે દરમિયાન એક ડમ્પર ટ્રકે તેમને ટક્કર મારી હતી. જેના કારણે તેઓ ગંભીર રીતે ઘાયલ થયા હતા. ઘટનાસ્થળે હાજર પોલીસકર્મીઓ દ્વારા તેમને તાત્કાલિક હોસ્પિટલ ખસેડવામાં આવ્યા હતા, પરંતુ ત્યાં તેમને મૃત જાહેર કરવામાં આવ્યા હતા.

સીસીટીવી ફૂટેજની મદદથી ટ્રક ડ્રાઈવર ઝડપાયો

ક્રાઈમ બ્રાન્ચે તાત્કાલિક કાર્યવાહી હાથ ધરી ટેકનિકલ સર્વેલન્સ અને સીસીટીવી ફૂટેજનું વિશ્લેષણ કરીને વાહનને ટ્રેક કર્યું હતું. તપાસકર્તાઓએ ટ્રકને દહેગામ સુધી ટ્રેસ કરી હતી અને એક ટીમ ત્યાં રવાના કરવામાં આવી હતી. આરોપી ડ્રાઈવર રૂપમસિંહ શમશેર ઠાકુર ત્યાં છુપાયેલો મળી આવ્યો હતો અને તેની ધરપકડ કરવામાં આવી હતી.

અધિકારીઓએ જણાવ્યું કે, આરોપી ઠાકુર મૂળ ઉત્તર પ્રદેશના ખલીલપુર ગામનો વતની છે અને હાલમાં અમદાવાદના ઓઢવ વિસ્તારમાં રહે છે. અમારી ટીમે સર્વેલન્સ ઇનપુટ્સ દ્વારા આરોપીને ટ્રેક કરીને અકસ્માતના ગણતરીના કલાકોમાં જ તેની ધરપકડ કરી છે. અકસ્માતનું ચોક્કસ કારણ જાણવા અને આરોપી નશાની હાલતમાં હતો કે કેમ, તે અંગે વધુ તપાસ ચાલી રહી છે.