MSUની ત્રણ ઐતિહાસિક ઈમારતોના રિસ્ટોરેશન માટે 15 કરોડની ગ્રાંટની માગણી

વડોદરાઃ એમ.એસ.યુનિવર્સિટીની આર્ટસ ફેકલ્ટીના ઐતિહાસિક બિલ્ડિંગ અને ગુંબજનું રિસ્ટોરેશન પૂર્ણતાના આરે છે.જેની પાછળ લગભગ પાંચ કરોડ રુપિયા જેટલો ખર્ચ થઈ ચૂકયો છે.

જોકે યુનિવર્સિટી પાસે બીજી પણ ઐતિહાસિક ઈમારતો છે અને હવે સત્તાધીશોએ તેના રિસ્ટોરેશન માટે રાજ્ય સરકાર પાસે ૧૫ કરોડ રુપિયાની ગ્રાંટની માગણી કરી છે.જે ઈમારતોનું રિસ્ટોરેશન જરુરી બન્યું છે તેમાં ફેકલ્ટી ઓફ પરફોર્મિંગ આર્ટસ, એજ્યુકેશન એન્ડ સાયકોલોજી ફેકલ્ટી અને ફાઈન આર્ટસ ફેકલ્ટીના પુષ્પબાગ બંગલોનો સમાવેશ થાય છે.જોકે સરકાર દ્વારા હજી ગ્રાંટ મંજૂર કરવામાં આવી નથી. સૂત્રોનું કહેવું છે કે, આ તમામ ઈમારતો ૯૦ કે તેના કરવા વધારે વર્ષ જૂની છે.તેમાં લાકડાનો વ્યાપક ઉપયોગ થયો છે અને આટલા વર્ષોમાં તેને ખાસો ઘસારો લાગ્યો છે.

પરફોર્મિંગ આર્ટસ ફેકલ્ટીની ઈમારત ૧૩૮ વર્ષ જૂની

પરફોર્મિંગ આર્ટસ  ફેકલ્ટીની ઈમારત તો ૧૩૮  વર્ષ જૂની છે.આ ઈમારતમાં મહારાજી સયાજીરાવના કાર્યકાળમાં ૧૮૮૬માં તેમાં ગાયન શાળાનો પ્રારંભ થયો હતો.૧૯૪૯માં તેને મ્યુઝિક કોલેજનો અને ૧૯૮૬માં ફેકલ્ટી ઓફ પરફોર્મિંગ આર્ટસનો દરજ્જો મળ્યો હતો.તેના લાકડાના દાદર, ગેલેરી જેવા હિસ્સાને વહેલી તકે સમારકામની જરુર છે.

એજ્યુકેશન સાયકોલોજી ફેકલ્ટીના બિલ્ડિંગમાં કાટમાળનો ઢગલો  

એજયુકેશન સાયકોલોજી ફેકલ્ટીની  ઈમારત પણ ૯૦ વર્ષ જૂની છે.૧૯૩૫માં આ ઈમારતમાં ટીચર્સ ટ્રેનિંગ કોલેજ શરુ થઈ હતી.યુનિવર્સિટીની સ્થાપા બાદ તેને એજ્યુકેશન એન્ડ સાયકોલોજી ફેકલ્ટીનો દરજ્જો મળ્યો હતો.ઈમારતમાં ફેકલ્ટી ડીનની ઓફિસ સહિતનો કેટલોક હિસ્સો અત્યારે ઉપયોગમાં પણ નથી લેવાતો અને કાટમાળના ઢગલા પડયા છે.

પુષ્પબાગ બંગલામાં ફાઈન આર્ટસ ફેકલ્ટી શરૃ થઈ હતી 

ફાઈન આર્ટસ ફેકલ્ટીમાં આવેલો પુષ્પબાગ બંગલો ૧૦૦ વર્ષ કરતા પણ જૂનો છે.ફાઈન આર્ટસ ફેકલ્ટીની ૧૯૫૦માં સ્થાપના થઈ ત્યારે ફેકલ્ટીની શરુઆત આ જ બંગલામાં થઈ હતી.૨૦૧૧ બાદ તેના રિસ્ટોરેશન પાછળ ૬૦ લાખ રુપિયો જેટલો ખર્ચ કરવામાં આવ્યો હતો.જોકે રિસ્ટોરેશન બાદ પણ આ બંગલાની ઉપેક્ષા કરવામાં આવી હતી.છેલ્લા કેટલાક વર્ષોથી તો તેને તાળા જ મારી રખાયા છે અને હવે ફરી વખત તેનું સમારકામ કરવું પડે તેવી સ્થિતિ ઉભી થઈ છે.