ગુજરાતમાંથી વર્ષે ૧ લાખ ટનથી વધુનો ઈ-વેસ્ટ : ચાર વર્ષમાં આઠ ગણો વધારો

અમદાવાદ, રવિવાર

મોબાઇલ, કમ્પ્યુટર, ચાર્જર, હેડ ફોન જેવા ઉપકરણો આજે પ્રત્યેકના જીવનનો એક મહત્વનો હિસ્સો બની ગયા છે. જોકે, આ ઉપકરણોની આવરદા પૂરી થતાં તેનો યોગ્ય રીતે નીકાલ કરવામાં આવે નહીં તો તેનાથી સર્જાતો ઈ-વેસ્ટ મોટું જોખમ સર્જે છે. ઈ-વેસ્ટથી થઇ રહેલા પ્રદૂષણનો સતત વધારો ચિંતાનો વિષય છે. 

સરકાર દ્વારા રજૂ કરવામાં આવેલી વિગતો અનુસાર ત્રણ વર્ષમાં ૨૪.૯૪ લાખ ટન ઈ વેસ્ટ સામે આવ્યો છે. જેમાંથી માત્ર ૪.૫૭ લાખ ટન ઈ વેસ્ટનો જ યોગ્ય રીતે નીકાલ કે રીસાયકલ થઇ શક્યું છે. આમ, ૨૦ ટકાથી પણ ઈ વેસ્ટનો યોગ્ય રીતે નીકાલ થઇ શકે છે. બાકીનો ૮૦ ટકા ઈ વેસ્ટ પૃથ્વી પ્રદૂષણના પ્રમાણમાં સતત વધારો કરે છે. ગુજરાત પોલ્યુશન કન્ટ્રોલ બોર્ડ દ્વારા ૨૦૧૭-૧૮માં ૧૨૯૮.૫૬૧ ટન, ૨૦૧૮-૧૯માં ૩૧૦૬.૩૦૮૫ ટન, ૨૦૧૯-૨૦મ ૧૪૧૮૫.૫૪ ટન અને ૨૦૨૦-૨૧માં ૧૦૯૪૬૩ ટન ઈ વેસ્ટ એકત્ર કરીને તેનો યોગ્ય નિકાલ કરવામાં આવ્યો છે.

ઈ વેસ્ટના નિકાલ માટે કાર્યરત્ એક સંસ્થાના ચિરાગ વ્યાસે જણાવ્યું કે, 'સમગ્ર દેશમાં હાલ દર વર્ષે ૨૧ લાખ મેટ્રિક ટન ઈ વેસ્ટ થાય છે, આ પ્રમાણ ૧૦ વર્ષ અગાઉ માંડ ૧ ટનની આસપાસ હતું. સમગ્ર દેશમાંથી જ્યાં સૌથી વધુ  ઈ વેસ્ટ થતું હોય તેવા ટોચના ૧૦ રાજ્યોમાં ગુજરાત છે. આજથી થોડા વર્ષ અગાઉ અમારી પાસે સમગ્ર રાજ્યમાંથી માંડ ૧  ટન ઈ વેસ્ટ આવતો હતો.જેની સરખામણીએ અમદાવાદમાંથી જ હાલ અમે દર મહિને સરેરાશ ૩ ટન  ડોમેસ્ટિક ઈ વેસ્ટ એકત્ર કરીએ છીએ. અમદાવાદમાંથી દર વર્ષે સરેરાશ ૩૬ મેટ્રિક ટન ઈ વેસ્ટ એકત્ર કરવામાં આવે છે. માત્ર ૧૮ ટકા ઈ વેસ્ટ યોગ્ય રીતે રીસાયકલ થાય છે. ઈ વેસ્ટનો યોગ્ય રીતે નિકાલ નહીં કરવાથી પ્રદૂષણની સાથે કેન્સર સહિતની બિમારીને નોતરું મળે છે. ઈ વેસ્ટના યોગ્ય નિકાલ માટે લોકોમાં જાગૃતિ ફેલાય તે જરૃરી છે. '

ગુજરાતમાંથી એકત્ર થયેલું ઈ-વેસ્ટ

વર્ષ             ઈ વેસ્ટ (ટનમાં)

૨૦૧૭-૧૮        ૧૨૯૮.૫૬૧

૨૦૧૮-૧૯       ૩૧૦૬.૩૦૮૫

૨૦૧૯-૨૦       ૧૪૧૮૫.૫૪

૨૦૨૦-૨૧       ૧૦૪૯૬૩.૮૦૩૨