Banaskantha News : બનાસકાંઠાના દાંતા તાલુકાના પાડલીયા ગામે વન વિભાગની જમીન વિવાદમાં પોલીસ અને ફોરેસ્ટ ટીમ પર થયેલા પૂર્વ આયોજિત હિંસક હુમલા બાદ પોલીસ તંત્ર હરકતમાં આવ્યું છે. આ હુમલામાં એક PI સહિત કુલ 47 જવાનો ઘાયલ થયા હતા. બનાવની ગંભીરતાને ધ્યાને લઈ આજે જિલ્લા પોલીસે ગામમાં મેગા કોમ્બિંગ ઓપરેશન હાથ ધર્યું છે.
ઘટનાના પગલે આજે સવારે 3 DySP, 10 PI, 12 PSI અને 200થી વધુ પોલીસ જવાનોનો કાફલો અંબાજીથી પાડલીયા જવા રવાના થયો હતો. પોલીસ દ્વારા FSLની ટીમને સાથે રાખીને ઘટનાસ્થળનું વૈજ્ઞાનિક ઢબે પંચનામું કરવાની કાર્યવાહી શરૂ કરાઈ છે. પોલીસે આ મામલે 27 લોકો સામે નામજોગ અને 500ના અજાણ્યા ટોળા સામે રાયોટિંગ અને સરકારી ફરજમાં રૂકાવટનો ગુનો દાખલ કર્યો છે. ઉલ્લેખનીય છે કે, પાડલીયામાં સર્વે નંબર 9ની વિવાદિત જમીન પર વન વિભાગ દ્વારા નર્સરી અને પ્લાન્ટેશનની કામગીરી દરમિયાન આ હિચકારો હુમલો કરવામાં આવ્યો હતો.
શું હતી ઘટના?
બનાસકાંઠા જિલ્લાના દાંતા તાલુકાના પાડલીયા ગામે આજે(13 ડિસેમ્બર) પોલીસ અને ફોરેસ્ટ કર્મચારી-અધિકારીઓ પર હુમલાની ઘટના બની હોવાની માહિતી મળી રહી છે. અંબાજી નજીક આવેલા પાડલીયા ગામે ફોરેસ્ટની જમીન વિવાદ બાદ બબાલ થઈ હતી. આ દરમિયાન સ્થાનિક લોકોના ટોળાએ પહેલા ફોરેસ્ટ ટીમ અને બાદમાં પોલીસ ટીમ પર હુમલો થયો હતો. જેમાં PI આર.બી. ગોહિલ સહિત 47થી વધુ પોલીસ અને ફોરેસ્ટના કર્મીઓ અને અધિકારીઓ ઘાયલ થયા છે. ટોળા દ્વારા વન વિભાગની ગાડીઓને સળગાવી દેવાઈ છે. જણાવી દઈએ કે, વન વિભાગની જમીનના લાંબા સમયથી ચાલતા વિવાદને લઈને શનિવારે સ્થિતિ અત્યંત તંગ બની હતી.
