બીઆરટીએસ કોરીડોરમાં એએમટીએસની ટક્કરથી મોપેડ ચાલક સગીરનું સ્થળ પર મોત

અમદાવાદ, શુક્રવાર

સીટીએમ પાસે બીઆરટીએસ કોરીડોરમાં પૂરઝડપે આવી રહેલી એએમટીએસના બસ ચાલકે મોપેડ લઇને જતા સગીરને સામેથી ટક્કર મારતા સ્થળ  ઉપર મોત હતું. જેમાં પિતાએ ના પાડી છતાં સગીર દુકાને જઇ રહ્યો હતો. અકસ્માત એટલો ગંભીર હતો કે અકસ્માત બાદ સગીર ૬૦  ફૂટ ઢસડાયો હતો. જેથી સગીરને માથા તથા મોંઢાના ભાગે ઇજાઓ થતાં લોહીના ખાબોચિયામાં તરફડિયા મારીને મોતને ભેટયો હતો.

સીટીએમ પાસે અકસ્માતમાં ૬૦ ફૂટ ઢસડાતાં લોહીના ખાબોચિયામાં તરફડીયા મારીને સગીર મોતને ભેટયો, ટ્રાફિક પોલીસે ગુનો નોંધી વધુ તપાસ શરુ કરી

અમરાઇવાડીમાં રહેતા અને વટવા કેનાલ પાસે કપડાની દુકાન ધરાવી ધંધો કરતા વેપારીએ ટ્રાફિક આઇ ડિવિઝન પોલીસ સ્ટેશનમાં એે.એમ.ટી.એસ ચાલક સામે ફરિયાદ નોંધાવી છે કે તેમના સગીર વયનો પુત્રએ ઘોરણ-૧૦ની પરિક્ષા આપી હતી અને વેકેશન માણી રહ્યો હતો. આજે સવારે પિતાને કહ્યુ કે તમે દુકાને મોડા આવો હું દુકાને જઇને સાફ સફાઇ કરુ છું જેથી પિતાએ ના પાડવા છતા તે પિતાનું જ્યુપીટર લઇને દુકાને જવા નીકળ્યો હતો. જ્યાં સીટીએમ એક્સપ્રેસ હાઇવેથી બીઆરટીએસ કોરીડોરમાથી પસાર થતો હતો. ત્યારે રાધિકા પાર્ક સોસાયટી પાસે પહોચ્યો તે સમયે પૂરઝડપે સામેથી આવી રહેલી એએમટીએસના બસ ચાલકે બીઆરટીએસ રૃટમાં ચલાવીને મોપેડને ટક્કર મારતા મોપેડ સાથે ૬૦ ફૂટ જેટલો ઢસડાયો હતો. જેથી તેને માથા અને શરીરના ભાગે ગંભીર ઇજાઓ થતા તેનું મોઢુ છુંદાઇ જતા લોહીના ખાબોચિયામાં મોતને ભેટયો હતો.