સાણંદમાં માઇક્રોનનો 'મેગા' પ્લાન્ટ વિશ્વના સૌથી મોટા ક્લિનરૂમની યાદીમાં સામેલ, આંતરરાષ્ટ્રીય સ્તરની ચિપનું નિર્માણ થશે

Micron’s Sanand Plant: સેમિકન્ડક્ટર ચિપના ઉત્પાદનમાં ભારત હવે વિશ્વના નકશા પર મજબૂત રીતે ઉભરી રહ્યું છે. સાણંદમાં માઇક્રોન ટેકનોલોજી દ્વારા સ્થાપિત કરવામાં આવેલો પ્લાન્ટ એક એન્જિનિયરિંગ અજાયબી સમાન સાબિત થયો છે. અહીં નિર્મિત 'ક્લિનરૂમ' હવે વિશ્વના સૌથી મોટા ક્લિનરૂમની યાદીમાં સ્થાન પામ્યો છે.

ક્લિનરૂમની વિશેષતા

માઇક્રોન ટેકનોલોજીના CEO સંજય મેહરોત્રાના જણાવ્યા અનુસાર, પ્રથમ ફેઝમાં જ 5,00,000 ચોરસ ફૂટ વિસ્તારમાં આ ક્લિનરૂમ તૈયાર કરાયો છે. આ વિશાળ પ્રોજેક્ટમાં થયેલા મટીરિયલનો વપરાશ આશ્ચર્યજનક છે. પેરિસના એફિલ ટાવર કરતા 3.5 ગણું વધુ લોખંડ વપરાયું છે. જ્યારે 100 ઓલિમ્પિક સાઈઝના સ્વિમિંગ પૂલ ભરાઈ જાય તેટલું કોંક્રિટ વાપરવામાં આવ્યું છે.

આ પણ વાંચો: સાણંદમાં ₹22,516 કરોડના ખર્ચે માઇક્રોનનો સેમિકન્ડક્ટર પ્લાન્ટ તૈયાર, જાણો કેવી રીતે બનશે ચિપ

ઓપરેશન થિયેટર કરતા પણ વધુ શુદ્ધ વાતાવરણ

સેમિકન્ડક્ટર ચિપના ઉત્પાદનમાં હવામાં રહેલો એક અતિ સૂક્ષ્મ કણ પણ ચિપને નષ્ટ કરી શકે છે. તેથી, સાણંદના આ પ્લાન્ટમાં આંતરરાષ્ટ્રીય ધોરણો મુજબનું વાતાવરણ ઉભું કરાયું છે. આ ક્લિનરૂમમાં હવા ઓપરેશન થિયેટર કરતા પણ વધુ સ્વચ્છ રાખવામાં આવે છે. હવાની ગતિને વર્ટિકલી (ઉપરથી નીચે) એકસરખી લયમાં રાખવા માટે ખાસ ફિલ્ટર સિસ્ટમ લગાવાઈ છે. તાપમાનમાં જો 1 ડિગ્રીનો પણ ફેરફાર થાય તો મશીનરી ખોટકાઈ શકે છે, તેથી અહીં અત્યંત સૂક્ષ્મ સ્તરનું તાપમાન નિયંત્રણ કરવામાં આવે છે.

આ પણ વાંચો: સેમિકન્ડક્ટર હબ સાણંદમાં ઉદ્યોગોને મળશે લક્ઝરી સુવિધા: 5-સ્ટાર હોટલ માટે પ્લોટની ફાળવણી, જાણો શું છે સરકારનો પ્લાન

રોજગારી અને ઇનોવેશનનું કેન્દ્ર

માઇક્રોન કંપની 2019થી ભારતમાં સક્રિય છે અને હાલમાં લગભગ 24,000 લોકોને રોજગારી પૂરી પાડી રહી છે. બેંગલુરુ અને હૈદરાબાદમાં કાર્યરત રિસર્ચ કેન્દ્રોની મદદથી અમેરિકાની ટીમો સાથે મળીને અત્યંત અદ્યતન DRAM મેમરી પ્રોડક્ટ્સ પણ ભારતમાં ડિઝાઇન કરવામાં આવી રહી છે.