વડોદરાના રાજમહેલ રોડ ઉપર આમલેટની લારી પર ઓનલાઈન ફ્રોડની આશંકાએ એક શખ્સને ટોળાએ મેથીપાક ચખાડી પોલીસના હવાલે કર્યો

Vadodara : વડોદરાના રાજમહેલ રોડ ઉપર ઓનલાઈન ફ્રોડની આશંકાએ યુવકને ટોળાએ મેથીપાક ચખાડી પોલીસના હવાલે કર્યો. યુવકને મારનાર સામે કાર્યવાહીની વાતથી ટોળાએ પોલીસ સ્ટેશને ભારે હોબાળો મચાવ્યો હતો.

 ગઈકાલે રાજમહેલ રોડ ભગતસિંહ ચોક નજીક આવેલ આમલેટની લારી પર ઓનલાઇન પેમેન્ટને લઇ વિવાદ સર્જાયો હતો. જેમાં રૂ.60ની રકમ ઑનલાઇન ચૂકવવા બાબતે ફ્રોડ જણાતા ટોળાએ યુવકને ઢીબી નાખ્યો હતો. આ અંગે લારી ધારકનું કહેવું હતું કે, ગ્રાહકે ઓનલાઇન પેમેન્ટ કર્યું હોવાનું મને જણાવ્યું હતું, ખરેખર કોઈ પેમેન્ટ થયું ન હતું અને ગ્રાહકે ફ્રોડ કર્યાની શંકા હતી. અગાઉ પણ આ પ્રકારની ઘટના ઘટી હતી, જેથી એક પ્રકારનું ફ્રોડ જણાતા સ્થળ પર લોકોએ તે યુવકને મેથીપાક ચખાડી નવાપુરા પોલીસના હવાલે કર્યો હતો. યુવક મધ્યપ્રદેશનો વતની અને હાલ માંજલપુર વિસ્તારમાં રહેતો હોવાની વિગતો જાણવા મળી છે. આ દરમ્યાન પોલીસને સોંપનાર લોકો સામે પોલીસે કાર્યવાહીની ચીમકી આપતા મોટી સંખ્યામાં ટોળું પોલીસ મથકે ઘસી ગયું હતું. અને પોલીસ કામગીરી સામે નારાજગી દર્શાવી ગંભીર આક્ષેપો કર્યા હતા.