પંચમહાલ: હાલોલ-પાવાગઢ રોડ પર સ્ક્રેપના ગોડાઉનમાં ભીષણ આગ, ચપેટમાં આવેલા રહેણાંક મકાનો પણ બળીને ખાખ

Major Fire at Halol: પંચમહાલ જિલ્લાના હાલોલ-પાવાગઢ રોડ પર આવેલ સ્ક્રેપના ગોડાઉનોમાં આજે(6 એપ્રિલ) અચાનક ભીષણ આગ ફાટી નીકળી હતી. આગની જ્વાળાઓ એટલી વિકરાળ હતી કે તેણે આસપાસના રહેણાંક વિસ્તારોને પણ પોતાની ચપેટમાં લીધા હતા. આ ઘટનાને પગલે સમગ્ર વિસ્તારમાં અફરા-તફરીનો માહોલ સર્જાયો છે અને આકાશમાં ધુમાડાના કાળા ગોટેગોટા માઈલો દૂરથી જોવા મળી રહ્યા છે.

રહેણાંક મકાનો અને ઝુંપડીઓ આગની ચપેટમાં

સ્ક્રેપના ગોડાઉનમાં લાગેલી આગ વધુ વિકરાળ બનતા બાજુમાં આવેલા ત્રણ પતરાવાળા કાચા મકાનો અને એક ઘાસની ઝુંપડીમાં પણ આગ પ્રસરી ગઈ હતી. એક મકાનમાં રહેલી તમામ ઘરવખરી બળીને ખાખ થઈ ગઈ છે. સદનસીબે, મકાનોમાં રહેતા લોકો સમયસૂચકતા વાપરી તુરંત બહાર નીકળી આવતા મોટી જાનહાનિ ટળી હતી.

ફાયર ફાઈટરોનો કાફલો ઘટનાસ્થળે

આગ બેકાબૂ બનતા હાલોલ ફાયર બ્રિગેડ ઉપરાંત કાલોલ, ઘોઘંબા અને આસપાસની ખાનગી કંપનીઓના ફાયર ફાઈટરોને તાત્કાલિક બોલાવવામાં આવ્યા છે. આગ ઓલવવાના સતત પ્રયાસો ચાલુ છે, પરંતુ સ્ક્રેપનો જથ્થો વધુ હોવાથી ફાયર વિભાગને ભારે મુશ્કેલીનો સામનો કરવો પડી રહ્યો છે. હાલની સ્થિતિ જોતા આગ પર કાબૂ મેળવવો પડકારજનક બની રહ્યો છે.

બીજી તરફ, સ્થાનિક પોલીસનો કાફલો પણ ઘટનાસ્થળે પહોંચી ગયો છે અને ભીડને કાબૂમાં લેવા તેમજ રાહત કામગીરીમાં મદદ કરવા તૈનાત છે. આગ લાગવાનું ચોક્કસ કારણ હજુ જાણી શકાયું નથી. પ્રાથમિક અંદાજ મુજબ શોર્ટ સર્કિટના કારણે આગ લાગી હોવાની શક્યતા સેવાઈ રહી છે, પરંતુ તપાસ બાદ જ સાચું કારણ બહાર આવશે.