સુરતના અલથાણ વિસ્તારમાં સ્થાનિકોના વિરોધના કારણે વર્કિંગ વુમન હોસ્ટેલની જગ્યા બદલાઈ

Surat : સુરત પાલિકા દ્વારા અલથાણ વિસ્તારમાં વર્કિંગ વુમન હોસ્ટેલ બનાવવા જાહેરાત કરી હતી અને ટેન્ડર બહાર પાડ્યા હતા. આ ટેન્ડર આધારે કામગીરી આપે તે પહેલાં સ્થાનિકોએ વર્કિંગ વુમન હોસ્ટેલ બને તો ટ્રાફિકની સમસ્યા થાય અને તે જગ્યાએ શાંતિ કુંજ બનાવવા માંગણી કરી હતી. સ્થળ સ્થિતિ જોઈને સ્થાયી સમિતિએ અલથાણના બદલે શ્યામ મંદિર નજીક મેટ્રો અને બીઆરટીએસના સ્ટેશનની નજીક હોસ્ટેલ બનાવવા જાહેરાત કરી છે. 

સુરત બહારથી નોકરી માટે આવતી મહિલાઓ માટે પાલિકા દ્વારા વર્કિંગ વુમન હોસ્ટેલ બનાવવાની કામગીરી શરૂ કરવામાં આવી છે. હાલ અડાજણ વિસ્તારમાં એક વર્કિંગ વુમન હોસ્ટેલ ચાલે છે ત્યાર બાદ પાલિકાએ અડાજણ અને અલથાણમાં બે વર્કિંગ વુમન હોસ્ટેલ બનાવવા જાહેરાત કરી ટેન્ડર બહાર પાડ્યા હતા. અડાજણમાં હાલ જ્યાં હોસ્ટેલ છે તેની નજીક જ પાલિકાનો પ્લોટ છે તેમાં બીજી હોસ્ટેલ બનાવવામાં આવશે. 

જ્યારે અલથાણ ખાતે ટીપી સ્કીમ નંબર 36માં ચાર રહેણાંક સોસાયટીની વચ્ચે પાલિકાનો અનામત પ્લોટ છે ત્યાં હોસ્ટેલ બનાવવા આયોજન કર્યું હતું અને ટેન્ડર પણ મંજુર થઈ ગયા હતા. દરમિયાન ચાર સોસાયટીના લોકોએ પાલિકાને રજૂઆત કરી હતી કે આ ચાર સોસાયટી વચ્ચે નાના રસ્તા પર હોસ્ટેલનું આયોજન છે. તેથી ભવિષ્યમાં ટ્રાફિક સમસ્યા થઈ શકે છે. આ સાથે જે પ્લોટ છે તેના પર વડીલો માટે શાંતિકુંજ બનાવવા માટે રજૂઆત કરી હતી. 

પાલિકાએ સ્થળ સ્થિતિનો અભ્યાસ કરીને સ્થળ બદલવાનો નિર્ણય કર્યો છે. સ્થાયી અધ્યક્ષ રાજન પટેલે જણાવ્યું હતું કે, લોકોની રજુઆત બાદ આ હોસ્ટેલ ટીપી સ્કીમ નં-37 ફાઈનલ પ્લોટ નંબર 11 મેઝ ગાર્ડન નજીક બનાવવા નિર્ણય કર્યો છે. આ હોસ્ટેલ શ્યામ મંદિર નજીક બનશે અને ત્યાંથી મેટ્રો અને બીઆરટીએસ સ્ટેશન બન્ને નજીક છે અને હોસ્પિટલનું પણ આયોજન થઈ રહ્યું છે તેથી હોસ્ટેલ માટે આ જગ્યા વધુ યોગ્ય છે તેથી હવે ત્યાં હોસ્ટેલ બનાવવા નિર્ણય કરાયો છે.