Leopard Terror in Amreli: અમરેલી જિલ્લાના વડિયા પંથકમાં વન્યપ્રાણીઓનો આતંક યથાવત્ છે. અગાઉ સિંહોના આંટાફેરા બાદ હવે દીપડાના આગમનથી ગ્રામજનોમાં ભયનો માહોલ ફેલાયો છે. વડિયાના હનુમાન ખીજડિયા ગામે દીપડાએ શ્વાનનો શિકાર કર્યાની ઘટના સામે આવી છે, જે સીસીટીવી કેમેરામાં લાઇવ કેદ થઈ હતી.
માત્ર 5 સેકન્ડમાં શિકાર
હનુમાન ખીજડિયા ગામમાં મકાનના ઓટલા પાસે બેઠેલા એક શ્વાન પર દીપડાએ હુમલો કર્યો હતો. સીસીટીવી ફૂટેજમાં સ્પષ્ટ જોઈ શકાય છે કે દીપડો અત્યંત ચતુરાઈથી અને દબે પગલે શ્વાનની નજીક પહોંચ્યો હતો. શ્વાનને કંઈ સમજાય તે પહેલાં જ દીપડાએ તેના પર તરાપ મારી હતી અને ગળાના ભાગેથી દબોચી લીધો હતો. આ સમગ્ર ઘટના માત્ર 5 સેકન્ડમાં બની હતી, જેમાં દીપડો શ્વાનને ઉપાડીને અંધારામાં નાસી છૂટ્યો હતો.
ગ્રામજનોમાં ભયનો માહોલ
આ પંથકમાં થોડા સમય પહેલા સિંહોના આંટાફેરા જોવા મળ્યા હતા, પરંતુ હવે દીપડાની અવરજવર વધતાં સ્થાનિક લોકોમાં ચિંતા પ્રસરી છે. રહેણાંક વિસ્તારમાં ઘૂસીને દીપડાએ શિકાર કરતાં ગ્રામજનો રાત્રિના સમયે બહાર નીકળતા પણ ડરી રહ્યા છે.
