SMCના દરોડા બાદ LCB-1 દોડતી થઇ, ગોરવા બાદ લક્ષ્મીપુરામાંથી 3 લાખનો દારૃ પકડ્યો

વડોદરાઃ સ્ટેટ મોનિટરિંગ સેલના દરોડા બાદ દોડતી થયેલી એલસીબીની ટીમે ગોરવા બાદ લક્ષ્મીપુરા વિસ્તારમાં ૩ લાખનો દારૃ,કાર અને મોબાઇલ કબજે કરી કેસ કર્યો છે.

સમતા હાઉસિંગ બોર્ડ નજીક આવેલા અંકુર એપાર્ટમેન્ટમાં રહેતો અમિત મુકેશભાઇ ઠક્કર દારૃનો મોટો જથ્થો લાવ્યો હોવાની માહિતી મળતાં એલસીબી ઝોન-૧ની ટીમે મધરાત્રે દરોડો પાડયો હતો.

આ વખતે કારમાંથી દારૃની પેટી ઉતારી રહેલો અમિત પોલીસના હાથે ઝડપાઇ ગયો હતો.પોલીસે કાર તેમજ ફ્લેટમાંથી દારૃની કુલ રૃ.૩.૧૧ લાખની ૨૦૫ બોટલ કબજે કરી હતી.પૂછપરછ દરમિયાન દારૃનો જથ્થો બિશ્નોઇ નામનો સપ્લાયર ગોલ્ડન ચોકડી પાસે આપી ગયો હોવાની માહિતી મળતાં તેને વોન્ટેડ જાહેર કરાયો છે.