આળસુ પુત્રનો વૃદ્ધ માતા પર જુલ્મ, સંબંધીને ત્યાંથી પૈસા લીધા વગર આવતા ઘરમાં પ્રવેશવા ન દીધી

Vadodara : વડોદરામાં એક બેરોજગાર પુત્રએ માતા ઉપર અસહ્ય જુલ્મ કરવા માંડતા આખરે વૃદ્ધ માતાએ અભયમની મદદ લીધી હતી. 

વડોદરાના પશ્ચિમ વિસ્તારમાં રહેતો યુવક કોઈ કામ ધંધો નહીં કરતો હોવાથી ઘર ચલાવવું મુશ્કેલ હતું. ઘરમાં વૃદ્ધ માતા રહેતી હોવાથી આ પુત્ર માતાને સંબંધી પાસે મોકલી પૈસા મંગાવતો હતો. 75 વર્ષીય માતા કોઈને કોઈ બહાનું બતાવી પૈસા લાવતી હતી અને તેનાથી ઘર ચાલતું હતું. 

બે દિવસ પહેલા પુત્રએ માતાને અમદાવાદ નજીક રહેતી બહેન એટલે કે માસીને ત્યાં પૈસા લેવા મોકલી હતી. માતા જવા માટે તૈયાર ન હતી પરંતુ પુત્રએ ધાકધમકીઓ આપતા ન છૂટકે તે બસમાં બહેનના ઘરે ગઈ હતી. 

દર વખતે મદદ કરતી બહેને આ વખતે પોતે રિટાયર્ડ થઈ ગઈ હોવાથી અને પેન્શન પર ઘર ચાલતું હોવાથી મદદ નહીં કરી શકે તેમ કહ્યું હતું. જેથી વૃદ્ધ માતા પૈસા લીધા વગર પરત આવી હતી.

માતાને ખાલી હાથ પરત આવેલી જોઈ પુત્ર રોષે ભરાયો હતો અને માતાને ઘરમાં પ્રવેશવા ન દીધી હતી. બહારગામથી થાકીને આવ્યા બાદ કલાકો સુધી ઘરની બહાર રહેલી માતાએ આખરે અભયમની મદદ લેતા ટીમે પુત્રનું કાઉન્સેલિંગ કરી કામ ધંધો કરવા માટે અને માતાનું ભરણપોષણ કરવા સલાહ આપી હતી. આખરે પુત્રએ લેખિતમાં માફી માંગી હવે પછી માતાને પરેશાન નહીં કરે તેની ખાતરી આપતા પોલીસ ફરિયાદ કરવાનું ટાળ્યું હતું.