અમદાવાદના કઠવાડામાં નવા બનેલા ઓડિટોરિયમનું 24 કલાકનું ભાડું રૂ.90 હજારથી 1.05 લાખ!
Summarized by AI; it may make mistakes. Check important info
Summarized by AI; it may make mistakes. Check important info
Kathwada Auditorium : અમદાવાદ મ્યુનિસિપલ કોર્પોરેશન (AMC) દ્વારા શહેરના નવા ભળેલા કઠવાડા વિસ્તારમાં રૂ. 39.70 કરોડના ખર્ચે બનેલા અદ્યતન ઓડિટોરિયમ બિલ્ડિંગ બનાવવામાં આવ્યું છે. ત્યારે સ્થાનિક રહીશોને પોતાના સામાજિક પ્રસંગો માટે સારી સુવિધાની આશા હતી. પરંતુ લોકોની આ આશા પર પાણી ફેરવી દેતા મ્યુનિ. કોર્પોરેશન દ્વારા ઓડિટોરિયમ, બેન્કવેટ હોલ અને મલ્ટિપર્પઝ હોલના તોતિંગ ભાડા નક્કી કર્યા છે. ત્રણ શિફ્ટમાં ઓડિટોરિયમનું એક દિવસનું કુલ ભાડુ રૂ.90 હજારથી 1.05 લાખ સુધી પહોંચે છે! જયારે બેન્કવેટ કે મલ્ટિપર્પઝ હોલનું એક દિવસનું બે શિફ્ટનું ભાડું રૂ.45 હજાર જેટલું થવા જાય છે.
અમદાવાદ મ્યુનિ.ની સ્થાયી સમિતિની આજે મળેલી બેઠકમાં કઠવાડા વિસ્તારમાં નવા બનેલા ઓડિટોરિયમ બિલ્ડિંગના ભાડા નક્કી કરવામાં આવ્યા હતા. આમ તો આ સુવિધા પ્રજાના પૈસે જ બની છે, માટે તેના ભાડા વાજબી હશે, તેવી આશા લોકોને હતી. પરંતુ તેનાથી વિપરિત મ્યુનિ.એ કમર્શિયલ એકમોને ટક્કર આપે તેવા તોતિંગ ભાડા નિયત કર્યા છે. સૌપ્રથમ ઓડિટોરિયમની વાત કરીએ સોમથી શુક્રવાર દરમિયાન સવાર, બપોર અને સાંજ એમ ત્રણ શિફ્ટમાં અનુક્રમે રૂ.25, 30 અને 35 હજાર ભાડુ નિયત કરાયું છે! જ્યારે શનિ-રવિવારની રજાના દિવસમાં આ ભાડુ રૂ.30, 35 અને 40 હજાર નક્કી કરાયું છે. એટલે કે 24 કલાક માટે ઓડિટોરિયમનું ભાડુ રૂ.90 હજારથી 1.05 લાખ સુધી થવા જાય છે.
આવી રીતે જ બેન્કવેટ કે મલ્ટિપર્પઝ હોલ માટે પ્રથમ અને બીજી એટલે કે સવાર અને સાંજની શિફ્ટ માટે અનુક્રમે રૂ.20 અને 25 હજાર ભાડુ નિયત કરાયું છે. મ્યુનિ. દ્વારા નક્કી કરાયેલા આ ભાડા સામાન્ય માણસોને કોઈ સંજોગોમાં પોષાય તેમ નથી. વળી આટલી મોટી રકમમાં તો ખાનગી એકમોમાં પણ સુવિધાઓ ભાડા પર મળી જતી હોય છે. ત્યારે જનરલ બોર્ડમાં ભાડાના આ દરમાં ઘટાડો કરવામાં આવે તેવી લાગણી નિકોલ અને કઠવાડા વિસ્તારના સ્થાનિક રહીશો દ્વારા વ્યક્ત કરાઈ છે.
માત્ર 110 ફોરવ્હીલર અને 56 ટુ વ્હીલરનું જ પાર્કિંગ
સૌથી મહત્ત્વની બાબત એ છે કે, આટલી મોટી તોતિંગ રકમનું ભાડુ ચૂકવ્યા બાદ પણ લોકોએ પાર્કિંગ માટે ફાંફા મારવા પડે તેવી શક્યતાઓ છે. કારણ કે મ્યુનિ.એ જ જાહેર કરેલી વિગતો અનુસાર આ સંકુલમાં 110 ફોર વ્હીલર અને 5દ ટુવ્હીલરની પાર્કિંગ ક્ષમતા છે. ત્રણેય જગ્યાએ અલગ-અલગ પ્રસંગો હોય તો ત્યાં આવનાર મુલાકાતીઓને પોતાના વાહનો પાર્ક કરવા માટે માત્ર આટલી જ જગ્યા મળશે.
ઓડિટોરિયમનો સફાઈ-વહીવટ ચાર્જ રૂ. 22,500
ઓડિટોરિયમ ભાડે રાખનારે તોતિંગ રકમનું ભાડું ચૂકવ્યા બાદ પણ સફાઈ અને વહીવટ ચાર્જના નામે પણ મોટી રકમ મ્યુનિ.ને આપવી પડશે. એક શિફ્ટનો સફાઈ વહીવટી ચાર્જ રૂ.7500 નક્કી કરાયો છે. ત્રણ શિફ્ટની કુલ રકમ રૂ.22,500 થાય છે. મ્યુનિ. તંત્ર આટલી રકમમાં તો અન્ય કેટલાક વિસ્તારમાં આખા કમ્યુનિટી હોલ ભાડે આપે છે.
