કરમસદ આણંદ મહાપાલિકામાં વીટકોસને તમામ બસના સર્વિસ રૂટ બંધ કરવા સૂચના

- સ્થાનિક સોસાયટીના રહીશોની રજૂઆત બાદ

- સેવા બંધ કરવા છતાં ટાઉન હોલ પાસે ઓફિસ રાખી લાંબા રૂટ શરૂ રખાતા બસના ખડકલાથી રોડ સાંકડો થયો

આણંદ : કરમસદ આણંદ મહાનગરપાલિકા વિસ્તારમાંથી વીટકોસની સેવાઓ બંધ કરવા છતાં ટાઉનહોલ પાસે ખાનગી ઓફિસ રાખીને સર્વિસરૂટ્સ ચાલુ રાખતા મનપાએ તમામ રૂટ્સ તાત્કાલિક બંધ કરવાની સૂચના આપી છે. 

કરમસદ આણંદ મહાનગરપાલિકા દ્વારા વીટકોસની સિટી બસ સેવા બંધ કરી દેવામાં આવી છે. ત્યારે વીટકોસ કંપનીએ આણંદના ટાઉનહોલ પાસે ઓફિસ રાખીને ટાઉનહોલથી લાંબા રૂટની બસ સર્વિસ શરૂ કરાઈ હતી. પરિણામે ટાઉનહોલ વિસ્તારના રસ્તા ઉપર બસનું પાર્કિંગ ખડકાઈ જતા રસ્તાઓ સાંકડા થઈ જવા સાથે વાહન વ્યવહારમાં તકલીફો પડી રહી હતી. બસો મોડી સાંજથી સવાર સુધી જાહેર રસ્તા ઉપર મૂકી દેવામાં આવતા રહીશો ભારે હાલાકી ભોગવી રહ્યા છે. આ અંગે ટાઉનહોલ વિસ્તારની સોસાયટીના રહીશોએ હાલાકી મુદ્દે મનપામાં રજૂઆત કરી હતી. 

કરમસદ આણંદ મનપાના ડેપ્યુટી કમિશનર એસ.કે. ગરવાલે જણાવ્યું હતું કે, રહીશોની ફરિયાદના આધારે વીટકોસના સંચાલકોને બોલાવીને તાત્કાલિક રૂટ્સ બંધ કરવા જાણ કરી છે. સંચાલકોએ દિવાળી પછી તુરંત બધા રૂટ બંધ કરવાની બાંહેધરી આપી છે. 

ઈલેક્ટ્રિક બસ લાવ્યા પહેલા વીટકોસ બંધ કરાતા મુસાફરો રઝળ્યા

મનપા વિસ્તારમાં વિટકોસ સેવા બંધ કરી હતી પરંતુ, અન્ય સિટી બસ શરૂ કરવા આગોતરું આયોજન નહીં કરાતા હાલ દિવાળી ટાણે લોકો રિક્ષા સહિત ખાનગી વાહનોમાં બહોળું ભાડું ચૂકવવા મજબૂર બન્યા છે. મનપા દ્વારા પાંચ ઈલેક્ટ્રિક સિટી બસ દોડાવવાનું આયોજન કરી રહી છે. પરંતુ, બસો લાવવામાં ૩ મહિના જેટલો સમય વીતિ જવાની સંભાવના છે. ત્યારે ઈલેક્ટ્રિક બસ શરૂ કર્યા વગર વીટકોસ બંધ કરી દેવાનો નિર્ણય ઉતાવળિયો હોવાનું સ્થાનિકો જણાવી રહ્યા છે.