જામનગર પોલીસ એક્શન મોડમાં: ડ્રિન્ક ઍન્ડ ડ્રાઇવ અને બ્લેક કાચ ધરાવતા વાહનો સામે કડક કાર્યવાહી

Jamnagar Police Action Mode: જામનગર શહેર અને જિલ્લામાં 31 ડિસેમ્બર અને નવા વર્ષના આગમન અગાઉ દારૂના બંધાણીઓ બેફામ બનતા હોય છે. જેઓને અંકુશમાં લાવવા માટે જામનગરના એસ.પી. ડૉ. રવિ મોહન સૈની દ્વારા સમગ્ર જિલ્લામાં કડક હાથે ચેકિંગ કરવા માટેના આદેશો કરાયા છે, અને પોલીસ તંત્ર ગઈકાલથી જ હરકતમાં આવી ગયું છે, અને છેક 31 ડિસેમ્બર સુધી સધન ચેકિંગની કાર્યવાહી અવિરત હાથ ધરવામાં આવશે, ઉપરાંત વાહન ચેકિંગ સહિતની પણ ડ્રાઇવ રાખવામાં આવી છે.

જે આદેશો અનુસાર જામનગરના સિટી-એ ડિવિઝન પોલીસ સ્ટેશનની ટીમ દ્વારા આવારા તત્ત્વો અને પીધેલાઓ સામે લાલ આંખ કરી ખંભાળિયા સર્કલ નજીક ડ્રિન્ક એન્ડ ડ્રાઇવ તેમજ વાહનોમાં બ્લેક કાચ, ગાડીઓના કાગળો સહિતનું ચેકિંગ હાથ ધરવામાં આવ્યું હતું.

 જામનગર શહેરમાં થર્ટી ફર્સ્ટ નજીક આવતાં નવા વર્ષની ઠેર-ઠેર ઉજવણી કરવામાં આવતી હોય છે. જેના ભાગરૂપે આવારા તત્ત્વો અને દારૂના બંધાણીઓ બેફામ બનતા હોય છે. જેને અંકુશમાં લાવવા પોલીસ દ્વારા કડક કાર્યવાહી કરવામાં આવી રહી છે.

 ગત મોડી રાત્રે જામનગર શહેર વિભાગના નાયબ પોલીસ અધિક્ષક જયવીરસિંહ ઝાલાની સૂચનાથી સિટી-એ ડિવિઝન પોલીસ સ્ટેશન ના પી. આઇ. નિકુંજસિંહ ચાવડાના માર્ગદર્શન હેઠળ પીએસઆઇ એમ. કે. બ્લોચ અને પીએસઆઇ ડી. જી. રામાનુજ સહિત સ્ટાફ દ્વારા શહેરના ખંભાળિયા ગેટ સર્કલ નજીક ડ્રિન્ક એન્ડ ડ્રાઇવ તેમજ વાહનોમાં બ્લેક કાચ, ગાડીઓના કાગળો સહિતનું ચેકિંગ હાથ ધરવામાં આવ્યું હતું. જેમાં ટ્રાફિક નિયમનનો ભંગ કરનારા વાહન ચાલકો સામે દંડકીય કાર્યવાહી કરવામાં આવી હતી. 

સાથોસાથ જામનગર શહેરના સીટી બી. ડિવિઝન પોલીસ સ્ટેશનના પી.આઇ. પી. પી. ઝા અને પીએસઆઇ એમ. વી. મોઢવાડિયા તેમજ તેઓની સમગ્ર ટીમ દ્વારા સિટી બી. ડિવિઝન પોલીસ સ્ટેશન હેઠળના વિસ્તારમાં સધન ચેકિંગ કરવામાં આવી રહ્યું છે, જ્યારે સીટી સી. ડિવિઝન પોલીસ સ્ટેશનની ટીમ દ્વારા પણ કડક હાથે ચેકિંગની કાર્યવાહી હાથ ધરવામાં આવી રહી છે.

જામનગર પોલીસની આ કાર્યવાહીથી નિમયોનો ભંગ કરનારાઓ, પીધેલા વાહન ચાલકો, તેમજ રોમિયોગિરી કરતાં આવારા તત્ત્વોમાં ફફડાટ વ્યાપી ગયો છે. જામનગર જિલ્લાના પોલીસ વિભાગ દ્વારા આ  કડક ચેકિંગની કાર્યવાહી 31 ડિસેમ્બર સુધી અવિવીરત ચાલુ રાખવામાં આવશે.