Illegal Hunting Racket Busted : બનાસકાંઠા જિલ્લાની ઇકબાલગઢ ફોરેસ્ટ રેન્જમાં વન્યજીવોના શિકારનું એક મોટું કૌભાંડ સામે આવ્યું છે. વન વિભાગે ગેરકાયદેસર રીતે શિકાર કરવા નીકળેલા 14 શિકારીઓની ટુકડીમાંથી હથિયારો સાથે 10 શિકારીઓને ઝડપી પાડ્યા છે, જ્યારે અન્ય 4 શિકારીઓ ફરાર થવામાં સફળ રહ્યા છે.
શિકારીઓએ કર્યો હતો નીલગાયનો શિકાર
પ્રાપ્ત માહિતી અનુસાર 14 શિકારીઓની એક ટુકડી બંદૂકો લઈને જંગલ વિસ્તારમાં વન્યજીવોનો શિકાર કરવા નીકળી હતી. આ શિકારીઓએ એક નીલગાયનો શિકાર કર્યો હોવાનું સામે આવ્યું છે. જોકે, તેઓ વધુ વન્યજીવોનો શિકાર કરે તે પહેલાં જ ઇકબાલગઢ ફોરેસ્ટ વિભાગની ટીમે સઘન પેટ્રોલિંગ દરમિયાન તેમને ઝડપી પાડવાની કાર્યવાહી હાથ ધરી હતી, જેમાં 10 આરોપીઓ પકડાઈ ગયા હતા.
આ પણ વાંચો: અમદાવાદમાં ગુનાખોરી ડામવા મોટો નિર્ણય: ગેરેજ-વર્કશોપમાં વાહન અને માલિકની નોંધણી ફરજિયાત
5 બંદૂકો જપ્ત, 4 બંદૂકો લાયસન્સ વગરની
વન વિભાગ દ્વારા ઝડપાયેલા શિકારીઓ પાસેથી કુલ 5 બંદૂકો જપ્ત કરવામાં આવી છે. આ હથિયારોની તપાસ કરતા મોટો ખુલાસો થયો છે કે જપ્ત કરાયેલી 5 બંદૂકોમાંથી 4 બંદૂકો લાયસન્સ વિનાની હતી. આ મામલે વન વિભાગે ગેરકાયદેસર શિકાર (વાઇલ્ડલાઇફ પ્રોટેક્શન એક્ટ) અને ગેરકાયદેસર હથિયારો રાખવા બદલ અર્મ્સ એક્ટ હેઠળ તમામ આરોપીઓ વિરુદ્ધ સત્તાવાર ફરિયાદ નોંધી છે.
તમામ આરોપીઓ જેલના સળિયા પાછળ
ઝડપાયેલા તમામ 10 આરોપીઓને કોર્ટ સમક્ષ રજૂ કરવામાં આવ્યા હતા, જ્યાંથી કોર્ટે તેમને જેલના સળિયા પાછળ મોકલી આપવાનો આદેશ આપ્યો છે. બીજી તરફ, ફરાર થઈ ગયેલા અન્ય 4 શિકારીઓને ઝડપી પાડવા માટે વન વિભાગ દ્વારા હાલમાં સઘન તજવીજ અને શોધખોળ હાથ ધરવામાં આવી છે. આ શિકાર પ્રવૃત્તિમાં અન્ય કોઈની સંડોવણી છે કે કેમ, તે દિશામાં પણ તપાસ ચાલી રહી છે.
