ધ્રાંગધ્રાના ગોપાલગઢની સીમમાંથી ગેરકયાદેસર માટી ખનન ઝડપાયું

એક હિટાચી મશીન, ત્રણ ડમ્પર સહિત ૬૦ લાખનો મુદામાલ જપ્ત

સ્થાનિક પોલીસ માત્ર ગેરકાયદેસર રેતી ભરેલા માત્ર વાહનો જપ્ત કરી સંતોષ માનતા પ્રાંત અધિકારી મેદાને પડયાં

ધ્રાંગધ્રા - ધ્રાંગધ્રાં પંથકમાં ગેરકાયદે ખનન રોકવામાં ઉણી ઉતરતા પ્રાંત અધિકારીએ ધ્રાંગધ્રાના ગોપાલગઢની સીમમાં દરોડા પાડી ગેરકયાદેસર માટી ખનન ઝડપાયું છે. તંત્રની ટીમે એક હિટાચી મશીન, ત્રણ ડમ્પર સહિત ૬૦ લાખનો મુદામાલ જપ્ત કરી કાર્યવાહી હાથ ધરી છે.

ધ્રાંગધ્રા તાલુકામાં બેફામ ખનન સામે તંત્ર હવે મહદ અંશે જાગ્યું હોય તેમ લાગી રહ્યું છે. એક તરફ સ્થાનિક પોલીસ દ્વારા ગેરકાયદેસર રેતી ભરેલા માત્ર વાહનો જપ્ત કરી સંતોષ માનવામાં આવી રહ્યો છે. ત્યારે બીજી બાજુ પ્રાંત અધિકારી દ્વારા સ્થળ પર જઈ રેઇડ કરી ગેરકાયદેસર ખનન ઝડપી પાડવામાં આવ્યું છે.

તાલુકાના ગોપાલગઢ ગામના સીમ વિસ્તારમાં થતા ગેરકાયદેસર માટી અને પથ્થરના ખનન અંગે પ્રાંત અધિકારી દ્વારા રેઇડ કરી ૦૧ હિટાચી મશીન અને ૦૩ ખનિજ ભરેલા ડમ્પરો સહિત અંદાજે રૃ.૬૦ લાખથી વધુનો મુદામાલ કબજે કર્યો હતો. અત્રે ઉલ્લેખનીય છેકે ધ્રાંગધ્રા તાલુકાના ગોપાલગઢ ગામે છેલ્લા ઘણા સમયથી ચાલતા પથ્થર અને માટીના ખનન અંગે અનેક રજૂઆતો કરવામાં આવી હતી જે રજૂઆત બાદ પ્રાંત અધિકારી દ્વારા રેઇડ કરવામાં આવીછે.