પોઇચા(ક) ગામની નજીક મહી નદીમાં ગેરકાયદે રેતીખનન

વડોદરા, તા.20 સાવલી તાલુકાના પોઇચા(ક) ગામ પાસે મહી નદીમાં ગેરકાયદે રેતીખનન ઝડપી પાડી તંત્રએ આશરે દોઢ કરોડ રૃપિયાનો મુદ્દામાલ કબજે કર્યો હતો. પોઇચા(ક) ગામના જ ત્રણ શખ્સો દ્વારા રેતીખનન ચાલતુ હોવાના પગલે આ અંગે કાર્યવાહી હાથ ધરવામાં આવી છે.

પ્રાપ્ત માહિતી મુજબ પોઇચા(ક) ગામ પાસેની મહી નદીના પટમાં મોટાપાયે સાદી રેતીનું ગેરકાયદે ખનન ચાલી રહ્યું છે તેવી માહિતીના આધારે ખાણખનિજના સ્ટાફ દ્વારા દરોડો પાડવામાં આવ્યો હતો. મહી નદીના પટમાંથી બિન્ધાસ્ત ગેરકાયદે રેતી ઉલેચતા બે એસ્કેવેટર, બે ડમ્પર, ચારણા અને નાવડી સહિત કુલ રૃા.૧.૫૦ કરોડનો મુદ્દામાલ જપ્ત કરવામાં આવ્યો હતો.

પોઇચા(ક) ગામે લાંબા સમયથી ગેરકાયદે રેતીખનન ચાલતુ હોવાથી તે દિશામાં પણ તપાસ હાથ ધરવામાં આવી છે. ગેરકાયદે ખનન ગામમાં જ રહેતા વાઘેલા ઘનશ્યામસિંહ ભગતસિંહ, વાઘેલા ક્રિપાલસિંહ પ્રવિણસિંહ અને યશપાલસિંહ છત્રસિંહ રાણા દ્વારા થતું હોવાની વિગતો બહાર આવતા મોટી રકમનો દંડ કરવાની કાર્યવાહી હાથ ધરવામાં આવી છે.