જૂનાગઢમાં જથ્થો પકડાયા બાદ આંતરરાષ્ટ્રીય રેકેટનો પર્દાફાશ : વડોદરા, નવસારી, સુરતમાં તપાસ થતાં ખૂલાસો: વધુ એક કિલો જથ્થા સાથે વડોદરા, નવસારી, રાજકોટની ૩ મહિલા સહિત વધુ 8 પકડાયાં
જૂનાગઢ, : જૂનાગઢમાંથી ગત તા. 2ના હાઈબ્રીડ ગાંજો વેંચવા નીકળેલા ચાર શખ્સ ૩ કિલોથી વધુ ગાંજા સાથે પકડાયા બાદ એલસીબીએ તપાસ કરતા હાઈબ્રીડ ગાંજાનું આંતરરરાષ્ટ્રીય રેકેટ હોવાનો પર્દાફાશ થયો છે. વધુ એક કિલો હાઈબ્રીડ ગાંજા સાથે વડોદરા, નવસારી, રાજકોટની ત્રણ મહિલા સહિત આઠ વ્યક્તિની ધરપકડ કરવામાં આવી છે. આમ, હાઈબ્રીડ ગાંજા મામલે કુલ 12 શખ્સોને પકડવામાં આવ્યા છે. પોલીસની પૂછપરછ દરમ્યાન હાઈબ્રીડ ગાંજાનું સમગ્ર નેટવર્ક બેંગકોકથી ચાલતું હોવાનું પણ સામે આવ્યું છે. હાલ આ મામલે વધુ તપાસ કરવામાં આવી રહી છે.
શહેરના ઈવનગર રોડ પરથી ગત તા. 2ના રાત્રે એલસીબી તથા એસઓજીએ વોચ ગોઠવી કારમાં હાઈબ્રીડ ગાંજો વેંચવા આવતા વિસાવદરના ધવલ કારૂ ભરાડ, જૂનાગઢના હુસેન નાસીર તુર્ક, મુજાહીદખાન રિયાઝખાન યુસુફજઈ અને જહાંગીરશા રજાકશા શાહમદારને પકડી લીધા હતા. આ ચારેય ઉપરાંત તેને ગાંજો આપી જનાર રાજકોટની શેરબાનુ, વડોદરાના મોબાઈલ ધારક તથા જૂનાગઢના મોઈન ખંધા સામે એનડીપીએસ એક્ટ મુજબ ગુનો દાખલ કરવામાં આવ્યો હતો. પોલીસે કુલ 1.10 કરોડનો ગાંજો કબ્જે કર્યો હતો.
આ બાબતની ગંભીરતાને ધ્યાને લઈ એસપી સુબોધ ઓડેદરાએ તપાસ એલસીબીને સોંપી હતી. પીઆઈ કે.એમ. પટેલ સહિતના સ્ટાફે મુજાહીદખાન રિયાઝખાન યુસુફજઈની પૂછપરછ કરતા તેણે અન્ય શખ્સોના નામ આપ્યા હતા. મોબાઈલ નંબરના આધારે વડોદરાના ઈરફાને રાજકોટની શેરબાનુને બેંગકોક હાઈબ્રીડ ગાંજો લેવા મોકલી હતી. ત્યારબાદ તે જૂનાગઢ આવી હતી અને જૂનાગઢના ચાર શખ્સોને 1.10 કરોડની કિંમતના હાઈબ્રીડ ગાંજાના 3 પેકેટ આપ્યા હતા, જ્યારે એક તેની પાસે રાખ્યું હતું. મુજાહીદખાને વધુમાં પોલીસને જણાવ્યું હતું કે, શેરબાનુએ તેની પાસે રાખેલું હાઈબ્રીડ ગાંજાનું પેકેટ વેંચવા માટે વેરાવળના તેના મિત્ર સોહિલ શેખને કહ્યું હતું. સોહિલ શેખે સુરત રહેતી તેની બહેન ઉજમાને વાત કરી હતી. ઉજમાએ તેના સંપર્કમાં રહેલા મિત્ર ઈરફાનને હાઈબ્રીડ ગાંજો વેંચવા વાત કરી હતી. તેણે લેવા હા પાડી હતી. સોહિલ શેખ તથા શેરબાનુ સુરત ઉજમાના ઘરે ગયા હતા અને વડોદરાનો ઈરફાન તથા તેનો મિત્ર અફઝલ અબ્દુલગફાર જાનુવાલા, તેની પત્ની હાફીઝા પટેલ, જાવીદ મીરજા અને તેની પત્ની નિલોફરે સુરત ઉજમાના ઘરે જઈ હાઈબ્રીડ ગાંજાનું પેકેટ લીધુ હતું. ઈરફાન પેકેટ લઈ તેના સસરાના ઘરે નડીયાદ ગયો હોવાની બાતમી મળતા એલસીબીની એક ટીમ નડીયાદ પહોંચી હતી, જ્યાં ઈરફાન પાસેથી 32.76 લાખની કિંમતના હાઈબ્રીડ ગાંજાનું એક પેકેટ પકડી ઈરફાનની અટક કરવામાં આવી હતી.
ત્યારબાદ પોલીસે હાઈબ્રીડ ગાંજા મામલે જૂનાગઢના મોઈન સતાર ખંધા, વેરાવળના સાહિલ દાદા શેખ, રાજકોટની શેબાનુ મહમદરફીક નાગાણી, વડોદરાના તાંદલજા વિસ્તારના ઈરફાનખાન ઉર્ફે સોહિલ ઉર્ફે ઈરફાન ડબલ આરીફખાન પઠાણ, મુળ વેરાવળના અને હાલ નવસારી રહેતા જાવિદ અલીમહમદ મીરજા, વડોદરાના અફઝલ અબ્દુલગફાર મેમણ, વડોદરાની હાફીઝા યુસુફ વોરા અને નવસારીની નિલોફર અયુબ વોરાની ધરપકડ કરી છે.
