...એ ત્રણ સેકન્ડ અને યમરાજનો ભેટો ટળી ગયો! જામનગરમાં ભારે પવન ફૂંકાતા LED હોર્ડિંગ ધરાશાયી, ચાલકોનો ચમત્કારિક બચાવ

Jamnagar News: રોડ પર નીકળતા પહેલા ચેતજો! તંત્રને તમારા જીવની કોઈ જ પડી નથી! જામનગરના રણજીતસાગર રોડ પર એવી જ એક ઘટના બની છે. ગ્રીન સિટીની આગળ અને ભાનુ પેટ્રોલિયમની સામે એક ખાનગી સ્કૂલનું વિશાળ LED હોર્ડિંગ ભારે પવનના કારણે અચાનક ધરાશાયી થયું હતું. આ ઘટનાને પગલે થોડા સમય માટે અફરાતફરીનો માહોલ સર્જાયો હતો. સદનસીબે, માત્ર બે-ત્રણ સેકન્ડના વહેલા-મોડા થવામાં એક મોટી દુર્ઘટના ટળી ગઈ હતી અને ત્રણ લોકોનો આબાદ બચાવ થયો હતો. જેનો વીડિયો સોશિયલ મીડિયામાં વાઈરલ થઈ રહ્યો છે.

આંખો સામે જ હોર્ડિંગ તૂટી પડ્યું, ટુ-વ્હીલર ચાલકની સતર્કતાથી જીવ બચ્યા

પ્રત્યક્ષદર્શીઓના જણાવ્યા અનુસાર, જે સમયે હોર્ડિંગ તૂટી પડ્યું તે જ સમયે રોડ પરથી એક ટુ-વ્હીલર પર ત્રણ વ્યક્તિઓ પસાર થઈ રહ્યા હતા. અચાનક હોર્ડિંગને હલતું જોઈને ચાલકે સમયસૂચકતા વાપરી તાત્કાલિક બ્રેક મારી દીધી હતી. તેના ગણતરીની સેકન્ડોમાં જ વિશાળ LED હોર્ડિંગ ધડાકાભેર રોડ પર પટકાયું હતું.

બે-ત્રણ સેકન્ડનો ખેલ

જો ટુ-વ્હીલર થોડું પણ આગળ વધ્યું હોત, તો હોર્ડિંગ સીધું જ તેની પર પડવાની પૂરેપૂરી શક્યતા હતી. પડી ગયેલા હોર્ડિંગ અને ટુ-વ્હીલર વચ્ચે માત્ર થોડાક ફૂટનું જ અંતર રહ્યું હતું. આમ, ઘટનાને નજરે જોનારા લોકોના મતે ત્રણ લોકોની જિંદગી માત્ર બે-ત્રણ સેકન્ડના જ ફેરથી મોતના મુખમાંથી બચી ગઈ હતી.

રોડની બંને બાજુ ટ્રાફિક જામ, ફાયર બ્રિગેડની ટીમ તાત્કાલિક દોડી આવી

આ ઘટના અંગે સ્થાનિક લોકો દ્વારા કંટ્રોલ રૂમમાં જાણ કરવામાં આવતા જ ફાયર બ્રિગેડનો સ્ટાફ ઘટનાસ્થળે પહોંચી ગયો હતો. રોડ પર પડેલા એલ્યુમિનિયમના વિશાળ LED હોર્ડિંગના કારણે રસ્તાની બંને બાજુનો વાહન વ્યવહાર સંપૂર્ણપણે ખોરવાઈ ગયો હતો અને ટ્રાફિક જામ સર્જાયો હતો. ફાયર સ્ટાફે હોર્ડિંગના ભાગોને કટર વડે કાપ્યા હતા અને તેને સલામત રીતે રોડની બાજુમાં ખસેડ્યા હતા. ત્યારબાદ સમગ્ર માર્ગ પરથી અવરોધ દૂર કરીને વાહન વ્યવહાર ફરીથી પૂર્વવત કરવામાં આવ્યો હતો.

આ પણ વાંચો: VIDEO : રાજસ્થાનના રણપ્રદેશમાં હોલિવૂડ જેવો નજારો, શ્રીગંગાનગર-ચૂરુના રહેવાસીઓ ભયાનક બવંડરમાં ફસાયા

હોર્ડિંગ મહાનગરપાલિકાની મંજૂરીથી જ લગાવાયું હતું

સ્થળ પર હાજર મહાનગરપાલિકાના (મનપા) સ્ટાફના જણાવ્યા અનુસાર, આ હોર્ડિંગ લગાવવા માટે જામનગર મહાનગરપાલિકાની સત્તાવાર મંજૂરી લેવામાં આવી હતી. આ મંજૂરી તા. 04/04/2026થી તા. 01/06/2026 સુધીના સમયગાળા માટે માન્ય હતી અને તેની સત્તાવાર રસીદ પણ ઉપલબ્ધ હતી. આટલું વિશાળ કદનું હોર્ડિંગ ભરચક રોડ પર તૂટી પડવા છતાં કોઈ જાનહાની કે ઈજા થઈ નથી. તેમજ આસપાસની કોઈ જાહેર કે ખાનગી મિલકતને પણ નુકસાન થયું ન હોવાથી તંત્ર અને સ્થાનિકોએ રાહતનો શ્વાસ લીધો છે. બીજી તરફ લોકો મનપાની બેદરકારીની પણ ઝાટકણી કાઢી રહ્યા છે.