બાવળા-બગોદરા હાઇવે પર હિટ એન્ડ રન: જન્મદિવસે જ યુવાનનો મૃત્યુ થતા શોકનો માહોલ

Ahmedabad Accident: બાવળા-બગોદરા હાઇવે પર કલ્યાણગઢ ગામ નજીક ગઈકાલે રાત્રે લગભગ 10 વાગ્યે એક દર્દનાક હિટ એન્ડ રનનો બનાવ બન્યો. અજાણ્યા વાહને બાઈકને જોરદાર ટક્કર મારતાં 24 વર્ષીય રણજીતનું ઘટનાસ્થળે જ મોત નિપજ્યું હતું. દુ:ખદ વાત એ છે કે, આ ઘટના રણજીતના જન્મદિવસના દિવસે બની, જેના કારણે તેનો પરિવાર અને મિત્રોમાં શોકનું મોજું ફરી વળ્યું છે.

મળતી માહિતી અનુસાર, બગોદરા પોલીસને ઘટનાની જાણ થતાં તેઓ તાત્કાલિક ઘટનાસ્થળે દોડી ગયા હતા. મૃતદેહને પોસ્ટમોર્ટમ માટે મોકલવામાં આવ્યો છે. પોલીસે અજાણ્યા વાહનચાલક સામે અકસ્માતનો ગુનો નોંધી તપાસ હાથ ધરી છે. 

આ પણ વાંચો: પાટણ: કેન્દ્રીય વિદ્યાલયમાં સહ વિદ્યાર્થીએ વિદ્યાર્થીનીને બ્લેડના ઘા માર્યા, શાળા તંત્રની ભૂમિકા શંકાના દાયરામાં

રણજીતના પરિવારજનોનું રોકકળ થઈ રહ્યું છે, કારણ કે તેમણે એક જ દિવસમાં પોતાના યુવાન દીકરાનો જન્મદિવસ અને મૃત્યુ બંને જોયા. બગોદરા પોલીસે જણાવ્યું કે, આવી ઘટનાઓને રોકવા માટે હાઇવે પર વધુ સઘન પેટ્રોલિંગ અને નિયમોનું ચુસ્તપણે પાલન કરાવવાની જરૂર છે. આ ઘટનાએ ફરી એકવાર હિટ એન્ડ રનના વધતા જતા કેસો અને રસ્તા સલામતીના મુદ્દે ચર્ચા ઊભી કરી છે.