VIDEO: ડાંગમાં મેઘતાંડવ: ગીરા ધોધ બન્યો જોખમી, 20 ગામ સંપર્કવિહોણા, જીવના જોખમે નદી પાર કરતાં ગ્રામજનો
Summarized by AI; it may make mistakes. Check important info
Summarized by AI; it may make mistakes. Check important info
Heavy Rain In Dang : છેલ્લા બે દિવસથી ડાંગ જિલ્લામાં અવિરત અને ભારે વરસાદ વરસી રહ્યો છે, જેના કારણે જનજીવન અસ્તવ્યસ્ત થઈ ગયું છે. જિલ્લાની ઓળખ સમાન ગીરાધોધ પોતાના અસલ મિજાજમાં વહી રહ્યો છે અને તેનો રમણીય નજારો પ્રવાસીઓને આકર્ષી રહ્યો છે. જોકે, તંત્ર દ્વારા પ્રવાસીઓની સુરક્ષાને ધ્યાનમાં રાખીને ગીરાધોધ પાસે જવાની મનાઈ ફરમાવતો હુકમ જાહેર કરવામાં આવ્યો છે.
ડાંગમાં મેઘતાંડવ
ભારે વરસાદના કારણે ડાંગ જિલ્લાની મુખ્ય નદીઓ જેવી કે અંબિકા, પૂર્ણા, ગીરા અને ખાપરીમાં ઘોડાપૂર આવ્યું છે. નદીઓમાં પાણી ભયજનક સપાટી વટાવી રહી છે, જેના પરિણામે અનેક કોઝવે ઉપર પાણી ફરી વળ્યા છે. અનેક કોઝવે પાણીમાં ગરકાવ થતાં વાહન વ્યવહાર સંપૂર્ણપણે ખોરવાઈ ગયો છે. જિલ્લામાં કોઝવે ઉપર પાણી ફરી વળવાને કારણે 20થી વધુ ગામો સંપર્ક વિહોણા બન્યા છે અને તેમનો બહારની દુનિયા સાથેનો સંપર્ક કપાઈ ગયો છે.
આ પણ વાંચો: ગુજરાતમાં 25 જૂન સુધી ભારે વરસાદની આગાહી, આ જિલ્લામાં બે દિવસ ઑરેન્જ ઍલર્ટ
આ ઉપરાંત, સાપુતારા-વઘઈ મુખ્ય માર્ગ ઉપર પણ ઠેર-ઠેર ભેખડો ધસી પડવાના બનાવો બન્યા છે, જેના કારણે માર્ગ પર અવરજવર જોખમી બની છે. સ્થાનિક તંત્ર દ્વારા માર્ગો પરથી ભેખડો હટાવવાની કામગીરી ચાલી રહી છે, પરંતુ સતત વરસાદને કારણે કામગીરીમાં અવરોધ આવી રહ્યો છે.
આ બધાની વચ્ચે, અંબિકા નદી પરના સુસરદા કોઝવે પરથી ગ્રામજનો જીવના જોખમે નદી પસાર કરી રહ્યા હોવાનો એક વીડિયો વાયરલ થયો છે. આ વીડિયોમાં જોઈ શકાય છે કે પાણીનો પ્રવાહ તેજ હોવા છતાં ગ્રામજનો જીવ સટોસટની બાજી ખેલીને નદી પાર કરવા મજબૂર બન્યા છે. આ ઘટના તંત્રની નિષ્ક્રિયતા અને ગ્રામજનોની કફોડી હાલત છતી કરે છે.
ડાંગ જિલ્લામાં ભારે વરસાદને કારણે સર્જાયેલી આ સ્થિતિમાં તંત્ર દ્વારા તાત્કાલિક રાહત અને બચાવ કામગીરી હાથ ધરવામાં આવે અને સંપર્ક વિહોણા બનેલા ગામો સુધી પહોંચવા માટે વૈકલ્પિક વ્યવસ્થા કરવામાં આવે તેવી લોક માંગ ઊભી થઈ છે.
