પત્ની અને પુત્રની હત્યા કરનાર હરેશ વાઘેલાની આખરે ધરપકડ

દેવાને લઈ પતિ-પત્ની વચ્ચે ઝઘડો ઉગ્ર બનતા ગુનાને અંજામ આપ્યો

ઓનલાઇન ગેમિંગના રવાડે ચઢી જતા દેવું કર્યું  આપઘાત કરવા ધાબા ઉપરથી કુદવા પણ ગયો હતો

ગાંધીનગર :  ગાંધીનગર શહેરના સરગાસણમાં આવેલી શ્રી રંગ નેનોસિટી વસાહતમાં પત્ની અને પુત્રની હત્યા કરનાર હરેશ વાઘેલાની સારવાર પૂરી થયા બાદ પોલીસે તેની ધરપકડ કરી લીધી છે. પતિ પત્ની વચ્ચે દેવાને લઈ સવારે ઝઘડો થયા બાદ હત્યાના ગુનાને અંજામ આપ્યો હોવાની કબૂલાત કરી છે તો આપઘાત કરવા માટે તે ફ્લેટના ધાબા ઉપર ગયો હોવાનું પણ જણાવ્યું હતું.

સરગાસણ ખાતે આવેલી શ્રી રંગ નેનોસિટી વસાહતમાં મકાન નંબર આઈ-૩૦૩માં રહેતા મૂળ સુરેન્દ્રનગરના હરેશ કનુભાઈ વાઘેલાએ ગત ગુરૃવારના રોજ તેના ઘરે પત્ની આશાની ગળે ટૂંપો આપીને હત્યા કરી હતી અને ત્યારબાદ તેના પાંચ વર્ષના પુત્ર ધુ્રવનું પણ માથું પછાડીને હત્યા કરી નાંખી હતી. હરેશ દ્વારા પણ હાથની નસ કાપીને આપઘાતનો પ્રયાસ કરવામાં આવ્યો હતો ત્યારે તેના હાથની નસ કપાઈ ગઈ હોવાથી ગઈકાલે તેનું ઓપરેશન કરવામાં આવ્યું હતું. સારવાર બાદ હવે તે સ્વસ્થ થઈ જતા ઇન્ફોસિટી પોલીસ દ્વારા તેનો કબજો લઈને ધરપકડ કરી લેવામાં આવી છે. પત્ની અને પુત્રની હત્યા બદલ તેની ધરપકડ કરીને આવતીકાલે તેને રિમાન્ડ માટે પણ કોર્ટમાં રજૂ કરવામાં આવશે.

પોલીસની પ્રાથમિક પૂછપરછમાં બહાર આવ્યું છે કે, ગુરુવારે સવારના સમયે હરેશ દ્વારા કરવામાં આવેલા દેવાને લઈ પતિ પત્ની વચ્ચે ઉગ્ર તકરાર થઈ હતી અને ત્યારબાદ તેણે પત્નીની હત્યા કરી હતી અને પુત્રનું હવે શું થશે તેમ વિચારીને તેની પણ હત્યા કરી હતી. આ બંને હત્યા કર્યા બાદ આપઘાત કરવા માટે તે ફ્લેટના ધાબા ઉપર પણ પહોંચ્યો હતો પરંતુ કોઈ તેને જોઈ જતા તે પરત કર્યો હતો ત્યારબાદ ઘરમાં આવીને કાચ વડે પોતાના હાથની નસ કાપી લીધી હતી. એટલું જ નહીં શેરબજાર ઉપરાંત તે ઓનલાઈન ગેમિંગમાં પણ રમતો હતો અને તેના કારણે પણ તેનું દેવું થયું હોવાનું હાલના તબક્કે બહાર આવી રહ્યું છે.