ગુજરાતી હોકી પ્લેયર ગોવિંદ સાવંતે ટીમ સાથે સિલ્વર મેડલ જીત્યો હતો

આજે આંતરરાષ્ટ્રીય ઓલિમ્પિક દિવસઃ1960માં રોમ ઓલિમ્પિક્સમાં 

વર્ષ-2036માં ઓલિમ્પિક ગેમ્સની યજમાની માટે દેશની સાથે ગુજરાત આતુરઃ રાજકોટ જિલ્લાના સાત તાલુકામાં રમતનાં મેદાનો-સંકુલોના નિર્માણનું કામ ગતિમાં

રાજકોટ : વિશ્વમાં દર વર્ષે ૨૩મી જૂન આંતરરાષ્ટ્રીય ઓલિમ્પિક દિવસ તરીકે ઉજવવામાં આવે છે. ખેલ ક્ષેત્રે લોકો તથા વિશ્વના દેશોની ભાગીદારી વધારવાના હેતુથી તેની ઉજવણી કરવામાં આવે છે. આ દિવસે વિશ્વના વિવિધ ભાગોમાં વિવિધ પ્રકારના કાર્યક્રમો યોજવામાં આવે છે, જેમાં દરેક વર્ગના લોકો અને ખેલાડીઓ સામેલ થાય છે. અત્રે ઉલ્લેખનીય છે કે વડોદરાના ગોવિંદરાવ સાવંત એવા ગુજરાતી ફિલ્ડ હોકી પ્લેયર છે, જેમણે વર્ષ ૧૯૬૦માં રોમનાં ઈટલીમાં રમાયેલી સમર ઓલિમ્પિક્સમાં હોકીમાં ટીમ સાથે સિલ્વર મેડલ જીત્યો હતો.

આમ તો ઓલિમ્પિક ગેમ્સના પ્રારંભનો ઈતિહાસ આશરે ૩૦૦૦ વર્ષ જૂનો છે. પ્રાચીન ગ્રીસમાં ઈ.સ.પૂર્વે ૭૭૬માં ઓલિમ્પિક રમતોત્સવ થતો તેવો ઉલ્લેખ ઈતિહાસમાં જોવા મળે છે. એથેન્સમાં વર્ષ ૧૮૫૯માં ગ્રીક ઓલિમ્પિયાડની શરૂઆત થઈ, જે વર્તમાન ઓલિમ્પિક ગેમ્સની શરૂઆતનો પાયો બન્યો. ફ્રેન્ચ ઈતિહાસકાર અને શિક્ષણવિદ પિયર ડી કુબટને ઐતિહાસિક ઓલિમ્પિક ગેમ્સને પુનઃ યોજવા વિચાર રજૂ કર્યો. એ પછી કુબટન તથા ડેમેટ્રીસ વિકેલાસના વડપણ હેઠળ ૨૩ જૂન ૧૮૯૪ના રોજ, ફ્રાન્સના પેરિસમાં આંતરરાષ્ટ્રીય ઓલિમ્પિક સમિતિની સ્થાપના કરવામાં આવી. આ સમિતિ દ્વારા વર્ષ ૧૮૯૬માં એથેન્સના ગ્રીસમાં જ પ્રથમ ઓલિમ્પિક ગેમ્સનું આયોજન કરવામાં આવ્યું હતું.

 ભારતમાં વર્ષ ૨૦૩૬માં ઓલિમ્પિક ગેમ્સ યોજવા માટે દાવેદારી નોંધાવવામાં આવી છે. હાલ દેશના વિવિધ વિસ્તારોમાંથી આંતરરાષ્ટ્રીય કક્ષાના ખેલાડીઓ તૈયાર થાય તે માટે સ્પોર્ટસ ક્ષેત્રે આંતરરાષ્ટ્રીય સ્તરની માળખાકીય સુવિધાઓ વિકસાવામાં આવી રહી છે. વર્ષ ૨૦૩૬માં ઓલિમ્પિક ગેમ્સની યજમાની માટે ગુજરાત રાજ્યે કમર કસી છે અને રાજ્યમાં સ્પોર્ટસ ક્ષેત્રે આંતરરાષ્ટ્રીયકક્ષાની સુવિધાઓનું નિર્માણ કરવામાં આવી રહ્યું છે.

રાજકોટ જિલ્લામાં તાલુકા કક્ષાનાં સ્પોર્ટ્સ મેદાનો- સંકુલોના વિકાસ પર ભાર મુકવામાં આવી રહ્યો છે. હાલમાં જસદણમાં આશરે સાત એકર જમીનમાં અંદાજે રૂા.૮.૪૦ કરોડના ખર્ચે નિર્મિત તાલુકા કક્ષાના રમત સંકુલનું ઉદઘાટન કરવામાં આવ્યું છે. આ સંકુલમાં ઈન્ડોર રમતો જેવી કે ટેબલટેનિસ, બાસ્કેટ બોલ, કબડ્ડી, ખો ખો, જિમ, યોગા, જુડો, ચેસ, વેઈટ લિફ્ટિંગ તથા આઉટડોર ગેમ્સમાં એથ્લેટિક્સ, ફૂટબોલ, હેન્ડ બોલ અને વોલીબોલ માટે સુવિધા ઉપલબ્ધ કરાવવામાં આવી છે. રાજકોટ જિલ્લામાં હાલમાં તાલુકા કક્ષાએ સાત સ્પોર્ટ્સ ગ્રાઉન્ડ વિકસાવવાનું કામ ગતિમાં છે, જેમાં લોધિકામાં રૂા. ૧૩૨.૧૦ લાખના ખર્ચે, જશાપરમાં રૂા. ૮૧.૦૪ લાખ, કોટડા સાંગાણીમાં રૂા. ૫૦ લાખ, પડધરીમાં રૂા. ૫૭.૪૩ લાખ, જેતપુરમાં રૂા. ૭૫ લાખ, ઉપલેટામાં રૂા. ૫૧.૮૬ લાખ, ધોરાજીમાં રૂા. ૪૦.૫૮ લાખના ખર્ચે મેદાનો, સ્પોર્ટ્સ સંકુલનાં કામોનો સમાવેશ થાય છે.

- ઓલિમ્પિક ગેમ્સ વિશે જાણવા જેવું

- આંતરરાષ્ટ્રીય ઓલિમ્પિક કમિટીમાં અત્યારે ૧૦૬ સભ્યો તથા ૪૦ માનદ સભ્યો છે. આઈ.ઓ.સી.નું વડું મથક સ્વિટ્ઝર્લેન્ડના લોઝાનમાં આવેલું છે.

- ચાર પ્રકારની ઓલિમ્પિક ગેમ્સ યોજાય છેઃ વિન્ટર, સમર, યૂથ ઓલિમ્પિક ગેમ્સ (વાય.ઓ.જી.), પેરાલિમ્પિક્સ. 

- સમર ઓલિમ્પિક્સની જેમ, વિન્ટર ઓલિમ્પિક્સ દર ચાર વર્ષે યોજાતી હતી. વર્ષ ૧૯૯૪થી સમર અને વિન્ટર ગેમ્સ દર બે વર્ષે એકાંતરે યોજાય છે.

- વર્ષ ૨૦૨૪માં પેરિસના સમર ઓલિમ્પિક્સમાં ૩૨ રમતોની ૩૨૯ ઈવેન્ટનો સમાવેશ થયો હતો.

- વર્ષ ૨૦૨૬માં વિન્ટર ઓલિમ્પિક્સ ઈટાલીના મિલાનમાં યોજાશે.

- વર્ષ ૨૦૨૬માં ડકરમાં યોજાનારી યૂથ ઓલિમ્પિક ગેમ્સમાં ૨૫ રમતોનો સમાવેશ કરાયો છે.

- વર્ષ ૨૦૨૮માં લોસ એન્જલસમાં યોજાનારી ઓલિમ્પિક ગેમ્સમાં ૩૫ પ્રકારની રમતોનો સમાવેશ કરવામાં આવ્યો છે.

- પાંચ રિંગવાળા ઓલિમ્પિકના ધ્વજને  પિયર ડી કુબટને ડિઝાઈન કર્યો હતો. સન ૧૯૨૦માં બેલ્જિયમના એન્ટવર્પમાં યોજાયેલી ઓલિમ્પિક્સમાં આ ધ્વજ પ્રથમવાર લહેરાવાયો હતો.

- ૨૩મી જૂન,૧૯૪૮થી આંતરરાષ્ટ્રીય ઓલિમ્પિક દિવસની ઉજવણીની શરૂઆત

વર્ષ ૧૯૪૭માં સ્ટોકહોમમાં આંતરરાષ્ટ્રીય ઓલિમ્પિક સમિતિના ૪૧મા સત્રમાં ચેકોસ્લોવાકિયાના  આઈ.ઓ.સી.ના સભ્ય ડા. ગુ્રસે ઓલિમ્પિકના વિચારને પ્રોત્સાહન આપવાના હેતુથી આંતરરાષ્ટ્રીય ઓલિમ્પિક દિવસની ઉજવણીનો વિચાર રજૂ કર્યો હતો.  એ પછી જાન્યુઆરી ૧૯૪૮માં સેન્ટ મોરિટ્ઝમાં આઈ.ઓ.સી.ના ૪૨મા અધિવેશનમાં આ પ્રસ્તાવને મંજૂરી આપવામાં આવી અને રાષ્ટ્રીય ઓલિમ્પિક સમિતિઓને આ કાર્યક્રમના સંચાલનનો હવાલો સોંપાયો. એ પછી ૨૩મી જૂન ૧૯૪૮થી આંતરરાષ્ટ્રીય ઓલમ્પિક દિવસની ઉજવણીની શરૂઆત થઈ. તે સમયે પોર્ટુગલ, ગ્રીસ, ઓસ્ટ્રિયા, કેનેડા, સ્વિટ્ઝર્લેન્ડ, બ્રિટન, ઉરુગ્વે, વેનેઝુએલા અને બેલ્જિયમે પોતપોતાના દેશોમાં ઓલિમ્પિક દિવસનું આયોજન કર્યું હતું.

- ઓલિમ્પિક્સમાં મેડલ જીતનાર ગુજરાતના એકમાત્ર ખેલાડી વડોદરાના હતા 

સિલ્વર મેડલ વિનર ભારતીય હોકી ટીમના સભ્ય એવા ગોવિંદરાવ સાવંતનો જન્મ ૨૮  નવેમ્બર, ૧૯૩૫ના રોજ વડોદરામાં થયો હતો અને ૮ સપ્ટેમ્બર ૨૦૦૧માં વડોદરામાં તેમનો દેહાંત થયો. વર્ષ ૧૯૬૦ના રોમના ઓલિમ્પિક્સમાં ભારતમાંથી કુલ ૪૫ ખેલાડીઓએ ભાગ લીધો હતો. હોકીમાં ફાઈનલમાં પાકિસ્તાન સામે ભારતની ટીમની મેચ જામી હતી, જેમાં ભારતની ટીમ બીજા ક્રમે રહી હતી. ગુજરાતી ગોવિંદ સાવંત ભારતની ટીમમાં ૬ઠ્ઠા ક્રમના હોકી પ્લેયર હતા.