Gujarat Woman Dies in America: અમેરિકામાં વસતા ગુજરાતીઓ હુમલાની ઘટનાઓ અટકવાનું નામ નથી લઈ રહી. અમેરિકાના વર્જિનિયામાં સ્ટોર પર નોકરી કરતી વધુ એક મહેસાણાની મહિલાની ગોળી મારીને હત્યાની ધટના સામે આવી છે. મહેસાણા જિલ્લાના વિજાપુર તાલુકાના જંત્રાલ ગામની દીકરી મેઘનાબહેન પટેલ પર એક અજાણ્યા બુકાનીધારી શખસે સ્ટોરની અંદર જ ઘૂસીને અંધાધૂંધ ફાયરિંગ કર્યું હતું, જેમાં તેમનું ઘટનાસ્થળે જ મોત નીપજ્યું હતું. આ ઘટનાને પગલે મૃતકના વતન જંત્રાલ ગામમાં માતમ છવાઈ ગયો છે.
લૂંટના ઈરાદે ઘૂસેલા બુકાનીધારીએ હત્યા કરી
મળતી માહિતી અનુસાર, મેઘનાબહેન પટેલ છેલ્લા 10 વર્ષથી પોતાના પરિવાર સાથે અમેરિકામાં સ્થાયી થયા હતા અને વર્જિનિયા સિટીમાં એક સ્ટોરમાં નોકરી કરતા હતા. રોજની જેમ મેઘનાબહેન જ્યારે સ્ટોર પર હાજર હતા, ત્યારે એક બુકાનીધારી શખસ સ્ટોરની અંદર ધસી આવ્યો હતો. લૂંટ ચલાવવાના ઈરાદે આવેલા આ હુમલાખોરે કોઈ પણ ડર રાખ્યા વિના મેઘનાબહેન પર ફાયરિંગ કરી દીધું હતું. હુમલાની આ ભયાનક ઘટના બાદ સ્થાનિક પોલીસ તુરંત જ ઘટનાસ્થળે દોડી આવી હતી અને સમગ્ર વિસ્તારને કોર્ડન કરીને હત્યારાને પકડવા ચક્રો ગતિમાન કર્યા છે.
વતનમાં વૃદ્ધ માતા-પિતા ભાંગી પડ્યા
મેઘનાબહેનના મોતના સમાચાર મહેસાણા પહોંચતા જ તેમના વતન જંત્રાલ અને મોસાળ જામળા ગામમાં ભારે શોકનું મોજું ફરી વળ્યું છે. મૃતક મેઘનાબહેનના લગ્ન ઉપેન્દ્રભાઈ પટેલ સાથે થયા હતા. અમેરિકામાં તેમના પરિવારમાં પતિ ઉપેન્દ્રભાઈ, પુત્રી નકશીબહેન અને પુત્ર સ્મિત છે, જેઓ ત્યાં જ રહેતા હતા. જ્યારે મેઘનાબહેનના મોતના સમાચાર સાંભળીને જંત્રાલ ગામમાં રહેતા તેમના પિતા કરસનભાઈ પટેલ અને માતા કપિલાબેન ઘેરા આઘાતમાં સરી પડ્યા છે અને પરિવાર પર આભ તૂટી પડ્યું છે.
અમેરિકામાં ગુજરાતીઓની સુરક્ષા સામે ફરી સવાલ
રોજીરોટી કમાવવા અને સારા ભવિષ્યની આશાએ વિદેશ ગયેલા ગુજરાતીઓ અવારનવાર ત્યાંની સ્થાનિક ગેંગ અને લૂંટારુઓનો ભોગ બનતા રહે છે. વિજાપુરની દીકરીની હત્યા થતાં અમેરિકામાં વસતા (NRI) લોકોમાં પણ ભારે રોષ અને ભયનો માહોલ જોવા મળી રહ્યો છે. આ ઉપરાંત હત્યારાને કડક સજા થાય અને મેઘનાબહેનના પરિવારને ન્યાય મળે તેવી માંગ કરી રહ્યા છે.
