સતત બીજા દિવસે દેવભૂમિ દ્વારકામાં કમોસમી વરસાદ, 9 જિલ્લામાં ઍલર્ટ જાહેર

Gujarat Weather Alert: ગુજરાતમાં ઉનાળાની શરૂઆતે જ હવામાનમાં મોટો પલટો જોવા મળ્યો છે. રાજ્યના અનેક વિસ્તારોમાં કમોસમી વરસાદ (માવઠું) શરૂ થતાં વાતાવરણમાં ઠંડક તો પ્રસરી છે, પરંતુ ખેડૂતોના જીવ અદ્ધર થઈ ગયા છે. ખાસ કરીને દેવભૂમિ દ્વારકા જિલ્લામાં શુક્રવારે (ત્રીજી એપ્રિલ) વહેલી સવારથી ગાજવીજ સાથે ધોધમાર કમોસમી વરસાદ નોંધાયો છે.

નીચાણવાળા વિસ્તારોમાં પાણી ભરાયા

મળતી માહિતી અનુસાર, ગુરુવારે (બીજી એપ્રિલ) દેવભૂમિ દ્વારકા સહિત કેટલાક વિસ્તારોમાં વરસાદી ઝાપટાં પડ્યા બાદ આજે શુક્રવાર (ત્રીજી એપ્રિલ) વહેલી સવારથી દેવભૂમિ દ્વારકા જિલ્લામાં કમોસમી વરસાદ નોંધાયો છે. કલ્યાણપુરમાં સૌથી વધુ દોઢ ઇંચ વરસાદ ખાબકતા નીચાણવાળા વિસ્તારોમાં પાણી ભરાયા હતા. ખંભાળિયામાં પંથકમાં વ્યાપક પોણો ઇંચ જેટલો વરસાદ નોંધાયો છે. ભાટિયા અને ભાણવડમાં વરસાદી ઝાપટાં સાથે અડધો ઇંચ વરસાદ પડ્યો હતો, જેના કારણે અનેક માર્ગો પર પાણી ફરી વળ્યા હતા.

આ પણ વાંચો: અમદાવાદમાં સરખેજ-ધોળકા રોડ પર વૃદ્ધાનો મૃતદેહ મળતા ચકચાર, પોલીસે તપાસ હાથ ધરી

આજે નવ જિલ્લામાં વરસાદનું જોખમ

હવામાન વિભાગની આગાહી  અનુસાર, બે સક્રિય સાયક્લોનિક સર્ક્યુલેશન સિસ્ટમને કારણે રાજ્યના વાતાવરણમાં આ ફેરફાર આવ્યો છે. ત્યારે આજે બનાસકાંઠા, સાબરકાંઠા, કચ્છ, દેવભૂમિ દ્વારકા અને પોરબંદર મુખ્ય છે. આ વિસ્તારોમાં યલો ઍલર્ટ જાહેર કરવામાં આવ્યું છે. જૂનાગઢ, ગીર-સોમનાથ, અમરેલી, ભાવનગર અને દીવમાં પણ ભારે વરસાદ અને તીવ્ર પવન સાથે ગાજવીજની શક્યતા છે.

આગાહી મુજબ, વરસાદ દરમિયાન પવનની ઝડપ 30થી 40 કિમી પ્રતિ કલાક સુધી પહોંચી શકે છે. આગામી બે દિવસમાં રાજ્યના મહત્તમ તાપમાનમાં 2થી 3 ડિગ્રીનો ઘટાડો થવાની શક્યતા છે, જેનાથી ગરમીમાં આંશિક રાહત મળશે.

ખેડૂતોમાં ચિંતાનું મોજું

માવઠાના કારણે રવિ પાક અને કેરીના પાકને મોટા પાયે નુકસાન થવાની ભીતિ સેવાઈ રહી છે. ખેતરોમાં તૈયાર થયેલા પાક પર વરસાદ પડતાં ખેડૂતો ચિંતાતુર બન્યા છે.