ગુજરાતમાંથી એક વર્ષમાં 606 કરોડ રૂપિયાના દારૂ-ડ્રગ્સ પકડાયા, તંત્રની મીઠી નજર હેઠળ બેરોકટોક હેરાફેરી

Gujarat Drugs Case: ગુજરાત ડ્રાય સ્ટેટ હોવાના બણગાં વચ્ચે રાજ્યમાંથી એક વર્ષમાં 299 કરોડ રૂપિયાનો દારૂ પકડાયો છે. આવી રીતે જ 337 કરોડ રૂપિયાનો ડ્રગ્સનો જથ્થો પકડાયો છે. વિધાનસભામાં રજૂ થયેલાં આંકડા દારૂબંધીની કેટલી કડક અમલવારી થાય છે! તેની સાબિતી આપે છે. સબ સલામતના દાવા વચ્ચે બૂટલેગરો અને પેડલરો આટલા મોટા જથ્થામાં નશીલા પદાર્થો રાજ્યમાં લઈ આવે ત્યાં સુધી પોલીસને ગંધ સુદ્ધા આવતી નથી. જાણે ખુરશી અને ખાખીની મીઠીનજર હેઠળ ગુજરાત નશાનું કેન્દ્ર બની રહ્યું હોય તેવું ચિત્ર સર્જાયું છે.

કાયદો માત્ર કાગળ પૂરતો જ સિમિત

દારૂબંધીનો કાયદો માત્ર કાગળ પર જ રહી ગયો હોય તેમ એક વર્ષમાં રાજ્યભરમાંથી 269,11,03,328 રૂપિયાનો વિદેશી-દેશી દારૂ અને બીયરનો જથ્થો ઝડપાયો છે. જો કે, આ આંકડો માત્ર ઝડપાયેલા દારૂનો છે. આ સિવાય પ્યાસીએ ગટગટાવેલા દારૂનો હિસાબ માંડવામાં આવે તો આંકડા અનેક ગણા વધારે હશે. જેમાં સૌથી વધુ દારૂ બનાસકાંઠા, દાહોદ, સુરેન્દ્રનગર, રાજકોટ તથા કચ્છમાંથી ઝડપાયો છે. 

આ પણ વાંચો: 1 એપ્રિલથી પેઈનથી માંડી તાવ સુધીની દવાઓ થશે મોંઘી, 1000થી વધુ મેડિસિનના ભાવ વધશે

રાજ્યના સરહદ પર કડક બંદોબસ્ત હોવા છતાં રાજ્યમાં આટઆટલો દારૂ પહોંચે છે કેવી રીતે? તે પ્રશ્ન ઊભો થયો છે. સાથે જ દારૂની મોટાભાગની ઘટનામાં માત્ર હેરફેર કરનારની અટકાયત કરાઈ છે. એકલ દોકલ કેસમાં મુખ્ય આરોપીની અટકાયત કરી સરકાર અને પોલીસ વાહવાહી મેળવે છે. જ્યારે મોટાભાગના કિસ્સાઓમાં તેનો મુખ્ય સૂત્રધાર કોણ છે? દારૂ ક્યાંથી આવ્યો હતો? કોને પહોંચાડવાનો હતો? તે પ્રશ્નોનો ઉકેલ જવલ્લે જ મળે છે. એટલું જ નહીં શહેરમાં ધમધમતી દારૂની ભઠ્ઠી તેમજ વેચાણ કેન્દ્ર પર પણ જનતારેઈડ થાય ત્યારે પોલીસ તંત્રને પોતાની ફરજ યાદ આવે છે.

એક સમયે ગુજરાત મોડેલના નામે પ્રખ્યાત રાજ્ય ધીમે ધીમે નશીલા પદાર્થના વેચાણનું કેન્દ્ર બની રહ્યું છે. બહાર આવેલાં આંકડા મુજબ રાજ્યભરમાંથી દારૂ સિવાય પણ 337,44,54,909 રૂપિયાનો ડ્રગ-ગાંજા સહિતના કેફી દ્રવ્યોનો જથ્થો મળી આવ્યો હતો. નશાનું વધતું વેચાણ યુવાધનના ભવિષ્યને અંધારામાં ધકેલી રહ્યું હોય તેવી સ્થિતિ સર્જાઈ છે.