રેશનિંગ દુકાનધારકોની હડતાળનો ચોથો દિવસ: ગાંધીનગરમાં નિર્ણાયક બેઠક, સમાધાન પર સૌની નજર

Ration Shop Dealers Strike: રાજ્યભરના રેશનિંગ દુકાનધારકોની હડતાળનો આજે ચોથો દિવસ છે, ત્યારે લાખો ગરીબ અને મધ્યમ વર્ગના ગ્રાહકોની મુશ્કેલીઓ વધી રહી છે. આવશ્યક ચીજવસ્તુઓ મેળવવામાં ઊભી થઈ રહેલી અડચણોના કારણે સામાન્ય જનજીવન પર ગંભીર અસર પડી રહી છે. આ પરિસ્થિતિના તાત્કાલિક ઉકેલ માટે રાજ્ય સરકારનું અન્ન અને નાગરિક પુરવઠા વિભાગ સક્રિય બન્યું છે અને આજે ગાંધીનગર ખાતે વિતરક આગેવાનો સાથે એક મહત્ત્વપૂર્ણ બેઠક યોજાઈ રહી છે.

હડતાળ શરુ થયાના માત્ર ચાર દિવસમાં જ વિભાગ દ્વારા આ ત્રીજી વાર બેઠક બોલાવવામાં આવી છે. આ અગાઉ મંત્રી સ્તરે પણ વિતરકો સાથે બેઠક યોજાઈ હતી, પરંતુ તેમાં કોઈ નક્કર પરિણામ ન આવતા હવે ઉચ્ચ અધિકારીઓએ કમાન સંભાળી છે.

અન્ન અને નાગરિક પુરવઠા વિભાગના નિયામકે રેશન વિતરકોના આગેવાનોને તાત્કાલિક ગાંધીનગર સ્થિત નિયામકની કચેરી ખાતે બેઠક માટે તેડું મોકલ્યું હતું. મંત્રી સાથેની વાટાઘાટો નિષ્ફળ ગયા બાદ હવે અધિકારીઓની ટીમ વિતરકોની માગણીઓ અને સમસ્યાઓને સમજીને તેનો સ્વીકાર્ય ઉકેલ લાવવાનો પ્રયાસ કરી રહી છે. આ બેઠકમાં વિતરકો દ્વારા કરવામાં આવેલી મુખ્ય માગણીઓ પર વિગતવાર ચર્ચા થવાની પૂરી શક્યતા છે.

આજે યોજાઈ રહેલી આ બેઠક પર સૌની નજર ટકેલી છે. જો સરકાર અને વિતરકો, બંને પક્ષે સકારાત્મક વલણ અપનાવવામાં આવે, તો આજે જ આ વિવાદનો સુખદ અંત આવી શકે છે. રાજ્યના લાખો ગરીબ પરિવારો માટે રેશનિંગ સેવાઓનું વહેલી તકે પુનઃસ્થાપન થવું ખૂબ જ જરૂરી છે. જો આ બેઠક સફળ થશે તો ગ્રાહકોને પડેલી મુશ્કેલીઓનો અંત આવશે અને આગામી દિવસોમાં તેમને નિયમિત અનાજનો જથ્થો મળવાનું ફરી શરુ થઈ જશે.