ગુજરાતમાં ચૂંટણી પ્રચાર ICUમાં: ગરમી અને જનતાની નિરસતા જોઈ નેતાઓના હોશ ઊડ્યાં, શું મતદાન ઘટશે?

Gujarat Local Body Elections 2026: ગુજરાતમાં સ્થાનિક સ્વરાજ્ય ચૂંટણીને હવે ગણતરીના દિવસો બાકી રહ્યા છે. ત્યારે રવિવાર (19મી એપ્રિલ) જાણે પ્રચારનો દિવસ બની રહ્યો હતો. પરંતુ ચૂંટણીનો માહોલ જ જામતો નથી. ચૂંટણી કાર્યાલયો પણ કાગડા ઉડતાં હોય તેવા દ્રશ્યો જોવા મળી રહ્યા છે. મતદારોને સ્થાનિક સ્વરાજ્યની ચૂંટણીમાં રસ જ રહ્યો નથી. આ જોતાં આ વખતે પણ મ્યુનિસિપલ કોર્પોરેશનની ચૂંટણીમાં ઓછું મતદાન થાય તેવી ભીતિ છે. મતદારોની નિરસતાને જોઈ ઉમેદવારો અને રાજકીય પક્ષોની ચિંતા વધી છે.

હીટવેવની પ્રચાર પર 'બ્રેક', નેતાઓએ બદલ્યો શિડ્યુલ

સ્થાનિક સ્વરાજ્યની ચૂંટણીમાં એક બાજુ મતદારોમાં નિરસતા હોઈ ચૂંટણીનો માહોલ જામ્યો નથી. તો બીજી તરફ, કાળઝાળ ગરમીને લીધે સ્થિતિ એવી સર્જાઈ છે કે, ચૂંટણી પ્રચાર ફિક્કો બન્યો છે. ઉમેદવારોએ પ્રચારના શિડ્યુલમાં ફેરફાર કરવો પડ્યો છે. હીટવેવને જોતાં હવે ઉમેદવારોને ડોર-ટુ-ડોર સંપર્ક કરવા સૂચના અપાઈ છે. આ ઉપરાંત અત્યારથી જ સોસાયટી-ફ્લેટમાં ગ્રુપ મીટીંગ, નાની સભાનું આયોજન કરવા આદેશ કરાયો છે. હવે ઉમેદવારો વહેલી સવારે અને મોડી સાંજે જ પ્રચાર કરવા મજબૂર બન્યા છે. મોડી રાત સુધી જનસંપર્ક કરવામાં આવી રહ્યો છે. પરિસ્થિતિ એવી છે કે, ઉમેદવારોને સમર્થન સાંપડી રહ્યું નથી.

રાજકીય પક્ષોના પેટમાં ફાળ

હવે લોકોને ચૂંટણી લડવાનો હેતુ સમજાયો છે જેથી ઉમેદવારોને સવાલ પૂછાઈ રહ્યા છે. પ્રજાલક્ષી કામોનો હિસાબ માંગવામાં આવી રહ્યો છે. ક્યાંક આવકાર મળી રહ્યો છે તો ક્યાંક હુરિયો બોલાવાઈ રહ્યો છે. તક મળી છે ત્યારે મતદારો પોતાના વિસ્તારના કામો કરવાનું વચન માંગી રહ્યા છે. આજે રવિવાર પ્રચારનો દિવસ બની રહ્યો હતો કેમકે, રજા હોવાથી મતદારોનો રુબરુ સંપર્ક થઈ શકે તે માટે રેલી નીકળી હતી. પરંતુ પાંખી સંખ્યા જોવા મળી હતી. સોસાયટી-ફલેટમાં ઢોલ નગારા વાગ્યા પણ મતદારોએ રસ દાખવ્યો ન હતો.

આ વખતે મતદારોને રિઝવવા જાણે અઘરું બન્યુ છે. ચૂંટણી માહોલમાં સન્નાટો જોવા મળી રહ્યો છે, જેથી રાજકીય પક્ષોના પેટમાં ફાળ પડી છે. આ જોતાં આ વખતે ગત વખતની જેમ ઓછુ મતદાન થાય તેવી શક્યતા જોવાઈ રહી છે. રાજકીય ગણિત બદલાય તો નવાઈ નહીં.