ગુજરાતમાં ગુટકા, તમાકુ કે નીકોટીન યુક્ત પાન મસાલા વેચાણના, સંગ્રહ, વિતરણ પર વધુ એક વર્ષ પ્રતિબંધ

 
અમદાવાદ, તા. 4 સપ્ટેમ્બર 2020, શુક્રવાર

રાજ્યમાં પાન-મસાલા અને ગુટકા તેમજ તમાકુ પરનો પ્રતિબંધ વધુ એક વર્ષ માટે લંબાવવામાં આવ્યો છે. રાજ્યમાં ગુટકા તેમજ તમાકુ કે નિકોટીનયુક્ત પાન મસાલાના વેચાણ, સંગ્રહ અને વિતરણ પર હાલ પ્રતિબંધ છે. ત્યારે નાગરિકોનું સ્વાસ્થ્ય વધુ સ્વસ્થ બને તે માટે વધુ એક વર્ષ સુધી પ્રતિબંધ લંબાવવાનો નિર્ણય સરકારે કર્યો છે.

આ મામલે નાયબ મુખ્યપ્રધાન નીતિન પટેલે જણાવ્યું કે ગુટકામાં નિકોટીનની હાજરી હોવાથી માનવ આરોગ્યને ખૂબ જ નુકસાન થતું હોય છે. જેથી નાગરિકો તથા ભાવિ પેઢીના સ્વાસ્થ્યને જાળવી રાખવા માટે ગુટકા પર પ્રતિબંધ મૂકવો જરૂરી હોઇ આ નિર્ણય કરાયો છે. 

નાયબ મુખ્યમંત્રીએ ઉમેર્યુ કે, ફૂડ સેફટી સ્ટાન્ડર્ડ એકટ-2006 અન્વયેના નિયમો તથા રેગ્યુલેશન-2011 હેઠળ આ પ્રતિબંધ મૂકાયો છે. જે હેઠળ કોઇપણ ખાદ્યચીજમાં તમાકુ કે નીકોટીન ઉમેરવું એ પ્રતિબંધ છે. ગુટકામાં તમાકું કે નીકોટીનની હાજરી હોવાથી માનવ આરોગ્યને ખૂબ જ નુકશાન થતું હોય છે. જેથી નાગરિકો તથા ભાવિ પેઢીના સ્વાસ્થ્યને જાળવી રાખવા માટે ગુટકા પર પ્રતિબંધ મૂકવો જરૂરી હોઇ આ નિર્ણય કરાયો છે.

શૈક્ષણિક સંસ્થાની 100 વારની ત્રિજ્યામાં સિગારેટ તથા તમાકુ કે નીકોટીનની હાજરી હોય તેવા પદાર્થોનું વેચાણ કરવા માટે પ્રતિબંધનો અમલ તંત્ર દ્વારા સખત રીતે કરાઇ રહેલ છે. આ બાબતે છેલ્લા ત્રણ વર્ષમાં આરોગ્ય વિભાગના ખોરાક અને ઔષધ નિયમન તંત્ર દ્વારા આશરે 10 હજાર પેઢીઓની તપાસ કરી આશરે રૂ. 11 લાખ જેટલો દંડ વસુલાત કરવામાં આવેલ છે.

ઉલ્લેખનીય છે કે રાજ્યમાં 10 હજાર જેટલી પેઢીઓની તપાસ કરીને અત્યાર સુધી રૂપિયા 11 લાખનો દંડ વસૂલ કરવામાં આવ્યો છે.