રાજકોટને મળી 2 નવી વોલ્વો બસ, પણ રાજ્યભરમાં રાત્રિની સ્લીપર વોલ્વો બસ સેવા હજુ પણ બંધ!

Rajkot ST Division Volvo bus: રાજકોટ સહિત રાજ્યભરમાં ઉનાળાની સિઝન દરમિયાન એસટી તંત્રને રાત્રિ દરમિયાન ભરચક્ક ટ્રાફિક મળતો હોવા છતાં સ્લીપર વોલ્વો બસ લાંબા સમયથી ચાલુ કરવામાં આવી નથી. રાજકોટ ડિવિઝનની રાજકોટ-વડોદરાના રૂટ ઉપર અગાઉ રાત્રિ દરમિયાન સ્લીપર વોલ્વો બસ દોડતી હતી. તે પણ બંધ કરવામાં આવ્યા બાદ લાંબા સમયથી ટેન્ડર પ્રક્રિયા ફાઇનલ થઈ નહીં હોવાથી વોલ્વો સ્લીપર બસ ચાલુ થઈ નહીં હોવાનું જાણવા મળે છે.

વેકેશનના ધસારા વચ્ચે આજથી 2 નવી વોલ્વો શરૂ

રાજકોટ એસટી ડિવિઝનમાં મુસાફરોની સુવિધા માટે મોટો વધારો કરવામાં આવ્યો છે. વેકેશનની સિઝનને કારણે મુસાફરોનો ધસારો વધતાં રાજકોટ ડિવિઝન દ્વારા આજથી જ બે નવી વોલ્વો સીટર બસ સેવા શરૂ કરી દેવામાં આવી છે. આ બંને આધુનિક બસો રાજકોટ અને વડોદરા વચ્ચે દોડશે, જેનો સમય સવારે 9:30 કલાકે અને સાંજે 17 કલાકે (5 વાગ્યે) રાખવામાં આવ્યો છે. આ ઉપરાંત, મુસાફરોની સુવિધા માટે આગામી ટૂંક સમયમાં જ વધુ 5 નવી વોલ્વો બસો રાજકોટ-વડોદરા અને રાજકોટ-ભુજ રૂટ પર દોડાવવાનું આયોજન પણ પૂર્ણ કરી લેવાયું છે.

લાંબા અંતરના રૂટ પર વધશે કનેક્ટિવિટી

મુસાફરોની ભારે ડિમાન્ડને જોતાં એસટી તંત્ર દ્વારા લાંબા અંતરના રૂટ પર પણ કનેક્ટિવિટી વધારવામાં આવી રહી છે. રાજકોટથી સ્ટેચ્યુ ઓફ યુનિટી, રાજકોટ-મોરબી-જામનગર અને રાજકોટ-દાહોદના મહત્ત્વના રૂટ પર વધુ 6 નવી વોલ્વો સીટર બસો ટૂંક જ સમયમાં શરૂ કરવામાં આવશે. એસટી તંત્રના સૂત્રોના જણાવ્યા અનુસાર, રાત્રિના સમયે મુસાફરોની ભારે ભીડને ધ્યાનમાં રાખીને 15 મીટર લાંબી ખાસ 'ડબલ એક્સપ્રેસ બસ' શરૂ કરવાની ગંભીર વિચારણા ચાલી રહી છે. હાલ વોલ્વો બસનું ટેન્ડર ફાઇનલ થવાની પ્રક્રિયા અંતિમ તબક્કામાં છે અને તે પૂર્ણ થતાં જ આ તમામ નવી બસો રસ્તા પર દોડતી થઈ જશે.

આ પણ વાંચો: રેલવે વ્યવસ્થા અધૂરી? બુલેટ ટ્રેન તો આવશે, પણ અમદાવાદથી 10થી વધુ રાજ્યોમાં સીધી ટ્રેન નથી!

મુસાફરોના ભારે ટ્રાફિકથી આવકમાં મોટો ઉછાળો

ઉનાળુ વેકેશન એસટી તંત્ર માટે કમાણીની બાબતમાં ભારે ફળદાયી સાબિત થઈ રહ્યું છે. વેકેશનના કારણે એસટી બસોમાં મુસાફરોનો ભારે ટ્રાફિક જોવા મળી રહ્યો છે, જેના લીધે રાજકોટ ડિવિઝનની આવકમાં મસમોટો ઉછાળો આવ્યો છે. સામાન્ય દિવસોમાં રાજકોટ ડિવિઝનના વોલ્વો વિભાગની જે દૈનિક આવક 10થી 12 લાખ રૂપિયા આસપાસ રહેતી હતી, તે વેકેશનના ધસારાને કારણે સીધી વધીને રોજની 14થી 15 લાખ રૂપિયા સુધી પહોંચી ગઈ છે. આવકમાં થયેલો આ વધારો દર્શાવે છે કે મુસાફરો હવે સરકારી વોલ્વો બસોમાં મુસાફરી કરવાનું વધુ પસંદ કરી રહ્યા છે.