ધો. 12 વિજ્ઞાન પ્રવાહ અને ગુજકેટ-2022નું પરિણામ જાહેર, આ રીતે કરો ચેક

- વિદ્યાર્થીઓ અને વિદ્યાર્થીનીઓના લગભગ સમાન પરિણામ

- ઓવરઓલ પરિણામ 67.04 પર્સન્ટેજ

ગાંધીનગર, તા. 12 મે 2022, ગુરૂવાર

ગુજરાત માધ્યમિક અને ઉચ્ચત્તર માધ્યમિક શિક્ષણ બોર્ડ (GSEB) દ્વારા ધોરણ 12 સાયન્સની બોર્ડની પરીક્ષા અને ગુજકેટનું પરિણામ જાહેર કરી દેવામાં આવ્યું છે. આ અંગે માહિતી આપતા શિક્ષણ પ્રધાન જિતુ વાઘાણીએ જણાવ્યું હતું કે, તમામ વિદ્યાર્થીઓને પરિણામની શુભેચ્છાઓ. આ વિદ્યાર્થીઓની મહેનતનું પરિણામ છે. 

ધો. 12 વિજ્ઞાન પ્રવાહમાં ગુજરાતી માધ્યમનું પરિણામ 72.04 ટકા જ્યારે અંગ્રેજી માધ્યમનું પરિણામ 72.06 ટકા આવ્યું છે. રાજ્યની 61 જેટલી શાળાઓનું પરિણામ 10 ટકાથી પણ ઓછું આવ્યું છે. 85.78%  સાથે રાજકોટ સૌથી વધારે પરિણામ ધરાવતો જિલ્લો બન્યો છે જ્યારે 40.19% સાથે દાહોદ સૌથી ઓછું પરિણામ ધરાવતો જિલ્લો બન્યો છે. 

પરિણામ જાણવા માટે

બોર્ડ દ્વારા આપવામાં આવેલી સૂચનાઓ મુજબ વિદ્યાર્થીઓ www.gseb.org પરથી સવારે 10.00 વાગ્યાથી બેઠક ક્રમાંક (Seat Number) એન્ટર કરીને પરિણામ જાણી શકશે. આ પરિણામ ઓનલાઈન સ્વરૂપે જ હશે. ત્યાર બાદ 10 દિવસ પછી વિદ્યાર્થીઓને માર્કશીટ આપવામાં આવશે. 

જોકે મેડિકલ અને ઈજનેરીમાં પ્રવેશ માટે વિદ્યાર્થીઓએ રાહ જોવી પડશે. ઉલ્લેખનીય છે કે, મેડિકલના પ્રવેશ યુજી-નીટ આધારિત થતાં હોય છે અને સરકારી ઈજનેરી કોલેજમાં 5 ટકા બેઠકો JEEના આધારે ભરાતી હોવાથી સમગ્ર પ્રવેશ પ્રક્રિયા એક સાથે શરૂ થતી હોય છે. 

ગુજરાત શિક્ષણ બોર્ડની ધો. 12 વિજ્ઞાન પ્રવાહની મુખ્ય જાહેર બોર્ડ પરીક્ષા ગત તા. 28મી માર્ચથી 12મી એપ્રિલ દરમિયાન લેવાઈ હતી. આ વર્ષે ધો. 12 સાયન્સમાં વિદ્યાર્થીઓની સંખ્યા ઘણી ઓછી નોંધાયેલી. ધો. 12 સાયન્સમાં 95,982 રેગ્યુલર અને 11,984 રીપિટર સહિત કુલ 1,07,966 વિદ્યાર્થીઓ હતા. જ્યારે ગુજકેટમાં પણ આ વર્ષે વિદ્યાર્થીઓની સંખ્યામાં ઘટાડો નોંધાયો હતો અને 1,07,692 વિદ્યાર્થીઓ નોંધાયા હતા. તેમાંથી 1,02,913 વિદ્યાર્થીઓએ ગુજકેટની પરીક્ષા આપી હતી.

ધો. 12 વિજ્ઞાન પ્રવાહનું પરિણામ, માર્ચ 2022