માલવાહક ટ્રેક્ટર માટે લોકેશન ટ્રેકિંગ ડિવાઇસ ફરજિયાત બનાવવા સરકારનો પ્રસ્તાવ

સલામતી વધારવાના ઉદેશ્ય સાથે માર્ગ પરિવહન અને ધોરીમાર્ગ મંત્રાલયે 1 ઓક્ટોબર 2026થી તમામ માલવાહક ટ્રેક્ટરો માટે વ્હીકલ લોકેશન ટ્રેકિંગ ડિવાઇસથી સજ્જ હોવાનો ફરજિયાત બનાવવાનો પ્રસ્તાવ મૂક્યો છે.

સેન્ટ્રલ મોટર વાહન નિયમો 1989માં વધુ સુધારો કરવા માટે ડ્રાફ્ટ નોટિફિકેશનમાં જણાવ્યું છે કે, વ્હીકલ લોકેશન ટ્રેકિંગ ડિવાઇસ (વીએલટીડી) અને રેડિયો ફ્રિકવન્સી આઇડેન્ટિફિકેશન (આરએફઆઈડી) ટ્રાન્સસીવર સાથે સંકલિત કરાશે. જે કપલ્ડ ટ્રેલરમાંથી આરએફઆઈડી ડેટા વાંચવા અને તેને બેકએન્ડ પર ટ્રાન્સમિટ કરવામાં સક્ષમ હશે. 1 ઓક્ટોબર 2026 અથવા તે પછી ટ્રેક્ટરો વીએલટીડીથી સજ્જ હશે. ઇલેક્ટ્રોનિક ઓળખ અને ટ્રેક્ટર સાથે જોડી બનાવવા માટે બધા ટ્રેલરમાં આઈએસ 16722:2018 અનુસાર નિષ્ક્રિય આરએફઆઈડી ટૅગ્સ ફીટ કરવામાં આવશે. 1 એપ્રિલ, 2027 ના રોજ અથવા તે પછી  ટ્રેક્ટરો ઇવેન્ટ ડેટા રેકોર્ડર (ઇડીઆર)થી સજ્જ હશે. ઇડીઆર ઇવેન્ટ્સનું વિશ્લેષણ કરવા અને સલામતી દેખરેખ વધારવા માટે જરૂરી પરિણામો રેકોર્ડ કરવામાં સક્ષમ હશે. મંત્રાલયે આ માટે વાંધા અથવા સૂચનો રજૂ કરવા 21 જુલાઈથી 30 દિવસનો સમય આપ્યો છે. આ નિયમોને કેન્દ્રીય મોટર વાહન (સુધારા) નિયમો, 2025 તરીકે ઓળખાશે.