ગોંડલ અને શાપરમાંથી રૂા. 60 લાખનું 85,000 લિટર બાયોડિઝલ કબજે

સ્થાનિક પોલીસને અંધારામાં રાખી રેન્જ પોલીસનો દરોડો : 4 ટેન્કર મળી રૂા. 1.70 કરોડનો મુદ્દામાલ કબજે : FSL ના રિપોર્ટ બાદ ગુનો દાખલ કરાશે

રાજકોટ, : રાજકોટ રેન્જમાં ખાણ-ખનીજની ચોરી સહિતની ગેરકાયદે પ્રવૃત્તિઓ ઉપર સ્થાનિક પોલીસને બદલે પોતાની ટીમ દ્વારા ડીઆઇજીએ દરોડા પડાવવાનું ચાલુ રાખ્યું છે. જેના ભાગરૂપે રેન્જ પોલીસની ટીમે ગોંડલ અને શાપરમાં દરોડા પાડી રૂા. 60 લાખની કિંમતનું 85,000 લિટર બાયોડિઝલ ઝડપી પાડયું હતું. 

રેન્જ પોલીસની ટીમે ગોંડલ-ગુંદાળા રોડ પર સૂર્યદિપ વેરહાઉસનાં ગ્રાઉન્ડમાં દરોડો પાડી અંદાજે 50,000 લિટર બાયોડિઝલ ભરેલા ત્રણ ટેન્કર સાથે ડ્રાઇવર પૃથ્વીસિંહ રાવત (રહે. રાજસ્થાન) અને ડ્રાઇવર સંતોષ યાદવ (રહે. ઉત્તરપ્રદેશ)ની અટકાયત કરી હતી. બીજો દરોડો શાપર-વેરાવળમાં પાડી 35,000 લિટર બાયોડિઝલ ભરેલા ટેન્કર સાથે ડ્રાઇવર ખોડાભાઇ વકાતર (રહે. કચ્છ)ની અટકાયત કરી હતી.

આ બંને સ્થળેથી એકંદરે રૂા. 60 લાખનું બાયોડિઝલ અને ચાર ટેન્કર મળી કુલ રૂા. 1.69 કરોડનો મુદ્દામાલ જપ્ત કર્યો હતો. બંને દરોડા અંગે ગોંડલ સિટી બી ડિવિઝન પોલીસ અને શાપર પોલીસમાં જાણવાજોગ નોંધ કરાવી હતી. 

હવે બાયોડિઝલના નમૂના એફએસએલમાં મોકલવામાં આવશે, જ્યાંથી રિપોર્ટ આવ્યા બાદ વિધિવત ફરિયાદ નોંધાવવામાં આવશે. ઉલ્લેખનીય છે કે રેન્જ પોલીસની ટીમ દ્વારા છેલ્લા ઘણાં સમયથી ખનીજ માફિયાઓ ઉપર ધોંસ બોલાવવામાં આવી રહી છે. હવે ગેરકાયદે રીતે બાયોડિઝલનો વેપલો કરનારાઓ ઉપર તવાઇ બોલાવવામાં આવી છે. પરિણામે સ્થાનિક પોલીસમાં ફફડાટ મચી ગયો છે.