આકાશ આંબતી કિંમતો વચ્ચે કસ્ટમ ઓફિસર 10 ગ્રામ સોનું પકડે તો માત્ર 1500 રૂપિયા પુરસ્કાર તરીકે મળે

Gold Smuggling: છેલ્લા કેટલાક સમયથી સોના અને ચાંદીની કિંમતમાં સતત વધારો જોવા મળ્યો હતો. આજથી એક વર્ષ અગાઉ પ્રતિ 10 ગ્રામ સોનાની 85,675 રૂપિયા હતી અને હવે તે વધીને 1.54 લાખ રૂપિયા થઈ ગઈ છે. એકતરફ સોનાની કિંમત લાખોમાં છે ત્યારે બીજી તરફ સ્મગલિંગમાં સોનું ઝડપનાર કસ્ટમ ઓફિસરને પ્રતિ 10 ગ્રામ દીઠ માત્ર 1500 રૂપિયાનું વળતર મળે છે.   

પુરસ્કારમાં છેલ્લા 10 વર્ષથી કોઇ ફેરફાર થયો નથી

અમદાવાદના સરદાર વલ્લભભાઇ પટેલ ઈન્ટરનેશનલ એરપોર્ટ ખાતેથી તાજેતરમાં 24 કલાકના અંતરમાં જ 1.80 રૂપિયા કરોડની કિંમતનું સોનું ઝડપાયું હતું. કસ્ટમ્સ એક્ટ 1962 પ્રમાણે સોના અને ચાંદીનું સ્મગલિંગ થતું અટકાવનાર કસ્ટમ ઓફિસર્સને વળતર આપવાની પણ ખાસ જોગવાઇ છે. કસ્ટમ ઓફિસર 10 ગ્રામ સોનું ઝડપે તો 1500 રૂપિયા અને 1 કિલો ચાંદી ઝડપે તો 3 હજાર રૂપિયાનો પુરસ્કાર મળે છે. એટલું જ નહીં આ પુરસ્કારની રકમ કસ્ટમ ઓફિસરે તેની ટીમમાં વહેંચી દેવી પડે છે. મતલબ કે, 1500નું વળતર પાંચ અધિકારીઓની ટીમ વચ્ચે વહેંચવામાં આવતાં દરેકને ફાળે માત્ર 300 રૂપિયાની રકમ આવે. એક તરફ સ્મગલિંગના પ્રમાણ અને સોનાની કિંમતમાં સતત વધારો થઈ રહ્યો છે, તો બીજી તરફ કસ્ટમ ઓફિસરને સ્મગલિંગના સોના-ચાંદી ઝડપવા પર અપાતા પુરસ્કારમાં છેલ્લા 10 વર્ષથી કોઇ ફેરફાર થયો નથી. 

આ પણ વાંચો: અમદાવાદ-વડોદરા એક્સપ્રેસ હાઇવે પર કાચ ભરેલી ટ્રક પલટી, ટ્રાફિક જામના દ્રશ્યો સર્જાયા

અઘૂરામાં પૂરું પુરસ્કારની રકમ માટે અધિકારીઓને વર્ષો સુધી રાહ જોવી પડે છે. પુરસ્કારની આ રકમ વધારવા અને તેને આપવામાં થતાં વિલંબને ઘટાડવા કસ્ટમ ઓફિસર દ્વારા અનેકવાર રજૂઆત છતાં ‘જૈસે થે સ્થિતિ છે.  કઇ ફ્લાઇટમાંથી, કોના દ્વારા સ્મગલિંગની સામગ્રી લાવવામાં આવી રહી છે તેના માટે કસ્ટમ્સ દ્વારા ખાસ બાતમીદાર પણ રાખવામાં આવે છે. આ બાતમીદારની માહિતી સાચી હોય તો તેને સ્મગલિંગમાં ઝડપાયેલા પ્રતિ 10 ગ્રામ સોના દીઠ માત્ર 3 હજાર રૂપિયાનો પુરસ્કાર મળે છે.