અમદાવાદમાં ફ્રોડ: ગૂગલ પરથી આંગડિયાનો નંબર શોધવો ભારે પડ્યો, ટોકન આધારે દિલ્હીથી રૂપિયા 27 લાખ ઉપડી ગયા

Online Angadia Number Cyber Fraud: ગાંધીનગરના એક વેપારીએ બેંગ્લોરમાં રહેતા પોતાના ભાઈ માટે મકાન ખરીદવા રતનપોળની આંગડિયા પેઢીમાં રૂપિયા 27 લાખ ભર્યા હતા. જોકે, ઠગ ટોળકીએ ટોકન નંબરના આધારે દિલ્હીથી આ રૂપિયા બારોબાર ઉપાડી લીધા હતા. આ બનાવ અંગે કાલુપુર પોલીસે અજાણ્યા 3 લોકો સામે ગુનો નોંધી વધુ તપાસ હાથ ધરી છે.

અડાલજમાં રહેતા વેપારીએ કાલુપુર પોલીસ સ્ટેશનમાં 3 અજાણી વ્યક્તિઓ સામે ફરિયાદ નોંધાવી છે. તેમના નાના ભાઈને બેંગ્લોરમાં મકાન ખરીદવાનું હોવાથી તેમણે રૂપિયા 27 લાખ માંગ્યા હતા. આથી, 3 મહિના પહેલાં ફરિયાદીના પુત્રએ બેંગ્લોર નાણાં ટ્રાન્સફર કરવા માટે ગૂગલ પર આંગડિયા પેઢીની માહિતી સર્ચ કરી હતી. જેમાં 'ઓમ સાંઈ આંગડિયા' નામની પેઢીનો મોબાઈલ નંબર મળતા તેના પર ફોન કર્યો હતો. ફોન પર રાહુલ અને શર્મા નામના ગઠિયાઓએ વોટ્સએપ કોલ દ્વારા વાતચીત કરી હતી.

ગઠિયાઓએ કાલુપુર રતનપોળ ખાતે આવેલી આંગડિયા પેઢીનું સરનામું આપી ત્યાં નાણાં જમા કરાવવા કહ્યું હતું. વેપારીએ આંગડિયા પેઢીમાં જઈને રૂપિયા 27 લાખ રોકડા જમા કરાવ્યા અને ત્યાંથી અસલી ટોકન નોટ મેળવી લીધી હતી. જોકે, મોડી સાંજ સુધી બેંગ્લોર ખાતે ભાઈને નાણાં મળ્યા ન હતા. તપાસ કરતા જાણવા મળ્યું કે ઠગ ટોળકીના રમેશ નામના શખ્સે રાહુલ અને શર્માના ઈશારે આંગડિયાની દિલ્હી શાખામાંથી આ જ ટોકન નંબરના આધારે રૂપિયા ઉપાડી લીધા હતા.