વડોદરા, તા. 13 ડિસેમ્બર 2021 સોમવાર
વડોદરા જિલ્લાના પાદરા ખાતે આવેલા ચોકરી ગામે જમીનમાં ધોવાણનું વળતર ચૂકવવામાં ગેઈલ કંપની દ્વારા ઠાગાઠૈયા કરવામાં આવતાં આજરોજ ગ્રામજનોએ ધારાસભ્યની આગેવાનીમાં વડોદરા ખાતે આવેલી ગેઈલ કંપની ની ઓફિસે ધરણાં યોજાયા હતા. અત્રે નોંધનીય છે કે છેલ્લા અઢી વર્ષથી ગ્રામજનોએ વળતર મેળવવા અનેક રજૂઆત કરવા છતાં સમસ્યાનું નિરાકરણ થયું નથી.
પાદરા વિધાનસભા મત વિસ્તારમાં આવેલા ચોકારીગામના ખેડૂતોને ગેઇલ ઈન્ડિયા કંપની દ્વારા નક્કી થયા મુજબ વળતર આપવામાં ઉદાસીનતા દાખવવામાં આવી રહી છે. અવાર-નવાર કલેકટરને આ બાબતે રજૂઆતો કરી છે પરંતુ દરેક વખતે અલગ-અલગ પ્રકારનાં કારણો દર્શાવી નાણાં ચૂકવવામાં બેદરકારી દાખવી રહ્યા છે. તે બાબતે આજરોજ પાદરાના ધારાસભ્ય જશપાલસિંહ પઢીયાર દ્વારા વડોદરાના અકોટા વિસ્તારમાં આવેલી ગેઇલ ઓફિસ ખાતે ગ્રામજનોની ઉપસ્થિતિમાં ધરણા યોજી વિરોધ પ્રદર્શિત કરવામાં આવ્યો હતો.
ચોંકારી ગામના ખેડૂત દિનેશભાઈ સોલંકીએ જણાવ્યું હતું કે, જ્યાં સુધી અમારી સમસ્યાનું નિરાકરણ નહીં આવે ત્યાં સુધી ધરણા યથાવત રહેશે અથવા કંપની લેખિતમાં બાંહેધરી આપે તો અમે ધરણા સમેટવા તૈયાર છીએ. ધારાસભ્ય જશપાલસિંહએ જણાવ્યું હતું કે, છેલ્લા અઢી વર્ષથી ગ્રામજનો વળતરની માગણી કરી રહ્યા છે. પરંતુ કંપની દ્વારા અલગ અલગ કારણોસર વળતર ચૂકવવામાં બેદરકારી દાખવવામાં આવી રહી છે.
અઢી વર્ષ અગાઉ ગેલ કંપની દ્વારા ડ્રીલીંગની કામગીરી દરમિયાન જમીનનું ધોવાણ થઇ જતા વિવાદ સર્જાયો હતો અને એસડીએમને રજૂઆત બાદ ચકાસણી હાથ ધરાતા કંપની દ્વારા સમાધાનનો ફોર્મ્યુલા અપનાવી 91 લાખનું વળતર ચૂકવવા ખાતરી આપી હતી પરંતુ આજદિન સુધી અનેક રજૂઆત છતાં ગ્રામજનોને વળતર ચુકવવામાં આવ્યુ નથી.
