મહુવામાં એક પરિવારના ચાર સભ્યોએ ઝેરી દવા પીધી

પાડોશમાં થયેલી ચોરીનો આક્ષેપ લાગતા

ચોરીની શંકાના આધારે પોલીસની કાર્યવાહીથી લાગી આવતા પરિવારે પગલું ભર્યું

બનાવ અંગે જાણવા મળતી વિગતો પ્રમાણે મહુવા શહેરના ધાવડી ચોક લુહાર શેરી ખાતે રહેતા વિનોદભાઈ બાબુભાઈ મકવાણા (ઉ.વ.૫૦), વિલાસબેન કમલેશભાઈ મકવાણા (ઉ.વ.૪૫), સન્નીભાઈ મુળજીભાઈ પરમાર (ઉ.વ.૩૦) અને કમલેશભાઈ મુળજીભાઈ પરમાર (ઉ.વ.૨૭)એ આજે સવારે ૭ કલાકના અરસામાં પોતાના ઘરે ઝેરી દવા પી જીવન ટૂંકાવવાનો પ્રયાસ કર્યો હતો. જેમને સારવાર માટે પ્રથમ મહુવાની સરકારી હોસ્પિટલ બાદ વધુ સારવાર માટે ભાવનગરની સર ટી.હોસ્પિટલમાં ખસેડવામાં આવ્યા હતા. પરિવારના ચાર સભ્યોએ એકી સાથે ઝેરી દવા પીવા મામલે સન્નીભાઈએ જણાવ્યું હતું કે, તેમના ૈંઘરની બાજુમાં ચોરી થઈ હતી. જે ચોરી અમે કરી હોવાનો ખોટો આક્ષેપ થયો હતો. તેથી પોલીસ  અવારનવાર પુછપરછ, મારી અને ઘરે આવી ચોરીનો માલ આપી દો તેવી માંગણી કરતા હતા અને તેનાથી લાગી આવતા તેમણે આ પગલું ભર્યું હતું. જ્યારે આ મામલો તપાસનો વિષય છે અને તપાસ બાદ આગળની કાર્યવાહી થશે તેમ મહુવા પીઆઈએ જણાવ્યું હતું.