સતત ત્રીજા વર્ષે સુરત પાલિકાની પેઈડ એફ.એસ.આઈની આવક એક હજાર કરોડને પાર કરી ગઈ

Surat Corporation : સુરત પાલિકામાં ઓકટ્રોય નાબુદી બાદ પાલિકાના મોટા ભાગના પ્રોજેક્ટ રાજ્ય અને કેન્દ્ર સરકારની ગ્રાન્ટ પર જ નભી રહ્યા છે. ઓકટ્રોય નાબુદી બાદ સુરત પાલિકાના બાંધકામ ક્ષેત્રમાં મંદીના માહોલમાં પણ પ્રોજેક્ટ વધી રહ્યાં છે તેના કારણે પેડ એફએસઆઈની આવક પાલિકા માટે સંજીવની બની રહી છે. ચાલુ નાણાકીય વર્ષે સુરત પાલિકાએ પેડ એફ.એસ.આઈ. ની આવક છેલ્લા બે વર્ષની જેમ એક હજાર કરોડને પાર કરી ગઈ છે. આ આંકડાના કારણે બાંધકામ ઉદ્યોગમાં મંદીની વાત બાજુએ રહી જાય છે. 

સુરત પાલિકા વિસ્તારમાં બાંધકામ ક્ષેત્રમાં મંદીની વાત કરવામા આવી રહી છે પરંતુ પાલિકાના પેડ એફ.એસ.આઈ.ના આંકડા આ વાત સાથે સંમત થતા ન હોય તેવું લાગે છે. પાલિકાના તંત્રે છેલ્લા ત્રણ વર્ષમાં પેઈડ એફ.એસ.આઈ.ની આવક એક હજાર કરોડનો આંકડો પાર કરી ગઈ છે. ગત નાણાકીય વર્ષમાં પેઈડ એફ.એસ.આઈ.નો આંક 1108 કરોડ હતો પણ આવક 1004 કરોડ થઈ હતી. આ વર્ષે 1040 કરોડનું લક્ષ્યાંક હતો પણ ટાર્ગેટ 96.57 ટકા સાથે 1004.37 કરોડની આવક થઈ છે. 

સુરત પાલિકાએ એપ્રિલ-2025થી માર્ચ-2026 દરમિયાન મધ્યસ્થ શહેર વિકાસ વિભાગ દ્વારા મોટા બાંધકામ, લેઆઉટ પ્રકારના ઓફલાઇન 256 પ્લાનો તથા ઓનલાઇન-ઇનગર પર 451 સહિત કુલ 707 વિકાસ પરવાનગીની ફાઇલોને મંજૂરી આપી હતી. જેમાંથી 286 પ્રોજેકટોને બીયુસી આપવામાં આવ્યા છે. આ ઉપરાંત  નવા બાંધકામ પ્લાન માટે અનિવાર્ય પ્લોટ વેલીડેશનની 2400 ફાઇલોને મંજૂરી આપવામાં આવી છે. છેલ્લા પાંચ વર્ષમાં સૌથી વધુ પ્લોટ વેલીડેશન વર્ષ ૨૦૨૫-૨૬માં મધ્યસ્થ શહેર વિકાસ વિભાગ દ્વારા આપવામાં આવ્યા છે. 

પાલિકાના ટાઉન પ્લાનિંગ વિભાગ ના અભિપ્રાય આધારે  પ્લોટ વેલીડેશન સર્ટિફિકેટ આપવામાં આવ્યા હતા જેના કાણે પાલિકાને  ૮ લાખ ચો.મી.થી વધુ જમીન કોન્ટ્રીબ્યુશન ઓફ લેન્ડ તરીકે મળી શકી છે.  જેમાં મહત્વનું એ છે કે, નોનટીપી વિસ્તારોમાં કોન્ટ્રીબ્યુશન ઓફ લેન્ડ તરીકે જમીન મોટાપાયે ઇશ્યુ થવાથી પ્રાથમિક સુવિધા, ઇન્ફ્રાસ્ટ્રક્ચર પ્રોજેક્ટ માટે મનપાને નવા વિસ્તારમાં જમીન મળી છે. 

મ્યુનિ. કમિશ્નરે છેલ્લા બે મહિનામાં 172 વિકાસ પરવાનગી ની ફાઈલ મંજુર કરી 

સુરત મ્યુનિ.ના નવા કમિશનર તરીકે એમ. નાગરાજન આવ્યા બાદ શહેર વિકાસ અને ટાઉન પ્લાનીંગ વિભાગની કામગીરી વધુ ઝડપથી બની છે. આ બે મહિનાનો સમય દરમિયાન તેઓએ   172 વિકાસ પરવાનગી ની ફાઈલ મંજુર કરી છે,. જેમાં  ૫૦ ફાઈલની ઓફલાઇન તથા ૧૪૨ ઓનલાઇન ફાઇલોને મંજૂરી આપવામાં આવી છે. આ સમય દરમિયાન ૬૭૯ જેટલી પ્લોટ વેલીડેશનની અરજીઓનો નિકાલ  થતા ૧.૬૭ લાખ ચો.મી. જગ્યા પાલિકાને  કોન્ટ્રીબ્યુશન ઓફ લેન્ડ તરીકે મળી છે.