માંડલના ટ્રેન્ટ ગામે વાસણની દુકાનમાં ગેસ સિલિન્ડર લીકેજ થતાં આગ ભભૂકી

ગેસ સિલિન્ડરમાં આગ લાગતા અફરાતફરી

ગ્રામજનોએ સિલિન્ડરને દુકાનમાંથી બહાર કાઢી પાણીનો છંટકાવ કરી આગને કાબૂમાં લીધી

ડુમાણા -  માંડલ તાલુકાના ટ્રેંટ ગામે મંગળવારે ચબૂતરા વિસ્તારમાં આવેલી વાસણની દુકાનમાં ગેસ સિલિન્ડર લીકેજ થતાં આગ લાગી હતી. આ ઘટનાને કારણે દુકાનમાં હાજર વેપારીઓ અને ગ્રાહકોમાં અફરાતફરી મચી ગઈ હતી.

ટ્રેન્ટ ગામમાં આવેલી કૈલાશભાઈ શાહની વાસણ દુકાનમાં એક વ્યક્તિ ગ્રાહકો માટે ચા બનાવી રહ્યો હતો. તે દરમિયાન સિલિન્ડર અચાનક લીકેજ થતાં તેમાં આગ ભભૂકી ઉઠી હતી. આગ લાગતાની સાથે જ આસપાસના વિસ્તારમાં ગભરાટ ફેલાઈ ગયો હતો. જોકે, ગામલોકોએ તાત્કાલિક હિંમત દાખવી પરિસ્થિતિને કાબૂમાં લેવાના પ્રયાસો શરૃ કર્યા હતા. તેઓએ સળગી રહેલા સિલિન્ડરને દુકાનમાંથી બહાર કાઢયો હતો.

આસપાસના લોકોએ સતત પાણીનો છંટકાવ કરીને સિલિન્ડરમાં મોટો વિસ્ફોટ થાય તે પહેલાં આગને બુઝાવી દીધી હતી. ગામલોકોની સમયસરની કાર્યવાહીને કારણે દુકાનદારને મોટી જાનહાનિ કે આથક નુકસાન ટળી ગયું હતું. ઘટનામાં કોઈ જાનહાનિ ન થતાં સૌએ રાહત અનુભવી હતી.