બોડેલી સેવા સદનમાં ભીષણ આગ, નાયબ કલેક્ટર કચેરીમાં અફરાતફરી, ફાયર સેફ્ટીનો હતો અભાવ

Fire Breaks Out at Bodeli Seva Sadan Deputy Collector Office: છોટાઉદેપુર જિલ્લાના બોડેલી ખાતે આવેલા સેવા સદન (નાયબ કલેક્ટરની કચેરી) બિલ્ડિંગમાં અચાનક ભીષણ આગ ફાટી નીકળતાં સમગ્ર પંથકમાં ચકચાર મચી ગઈ છે. સરકારી કચેરીમાં આગ લાગવાની આ ઘટનાને પગલે બિલ્ડિંગમાં હાજર અધિકારીઓ, કર્મચારીઓ અને પોતાના કામ અર્થે આવેલા લાભાર્થીઓમાં ભારે નાસભાગ અને અફરાતફરીનો માહોલ સર્જાયો હતો.

ફાયર બ્રિગેડ મોડું પડતાં આગ વધુ પ્રસરી

સ્થાનિક સૂત્રો પાસેથી મળતી માહિતી મુજબ, આગ લાગ્યાના તુરંત બાદ ફાયર વિભાગને જાણ કરવામાં આવી હતી. પરંતુ અત્યંત ગંભીર બાબત એ રહી કે ઘટનાના એક કલાક સુધી ફાયર ફાઇટર ઘટનાસ્થળે પહોંચી શક્યા ન હતા. આ સમયગાળા દરમિયાન આગે વધુ વિકરાળ સ્વરૂપ ધારણ કરી લીધું હતું અને બિલ્ડિંગના અન્ય હિસ્સાઓને પણ ઝપેટમાં લેવાનું શરૂ કરી દીધું હતું. કચેરીમાં રહેલા અગત્યના સરકારી દસ્તાવેજો અને ફાઇલો પણ આ આગની ચપેટમાં આવી હોવાની આશંકા સેવાઈ રહી છે.

સરકારી બિલ્ડિંગમાં જ ફાયર સેફ્ટીનો અભાવ!

આ અકસ્માતે સરકારી તંત્રની ઘોર બેદરકારી ફરી એકવાર છતી કરી દીધી છે. લાખો રૂપિયાના ખર્ચે બનેલા આ સેવા સદન બિલ્ડિંગમાં આગ ઓલવવા માટેની પ્રાથમિક 'ફાયર સેફ્ટી'ની કોઈ જ પૂરતી સુવિધા ઉપલબ્ધ ન હતી. જો બિલ્ડિંગમાં ફાયર સિસ્ટમ કાર્યરત હોત, તો ફાયર ફાઇટર આવે તે પહેલાં જ સ્થાનિક સ્તરે આગ પર કાબૂ મેળવી શકાયો હોત અને આ નુકસાન અટકાવી શકાયું હોત.

સમગ્ર બિલ્ડિંગ ખાલી કરાવાઈ, મોટો અકસ્માત ટળ્યો

આગની તીવ્રતા વધતી જોઈને વહીવટી તંત્ર તાત્કાલિક એક્શનમાં આવ્યું હતું. બિલ્ડિંગમાં હાજર તમામ કર્મચારીઓ અને વિવિધ યોજનાઓનો લાભ લેવા આવેલા સામાન્ય નાગરિકો-લાભાર્થીઓને સુરક્ષિત રીતે તાબડતોબ બિલ્ડિંગની બહાર કાઢવામાં આવ્યા હતા. સદ્દનસીબે આખી બિલ્ડિંગ સમયસર ખાલી કરાવી દેવામાં આવતા કોઈ જાનહાનિના સમાચાર નથી, જે એક મોટી રાહતની વાત છે. હાલમાં આગ લાગવાનું પ્રાથમિક કારણ શોર્ટ સર્કિટ હોવાનું મનાઈ રહ્યું છે, જોકે સત્તાવાર કારણ હજુ સામે આવ્યું નથી.