- કરમસદ-આણંદ મહાનગરપાલિકા વિસ્તારમાં
- હોટેલોમાં ખોરાકમાં ભેળસેળ, સ્વચ્છતાનો અભાવ, ગંદકી અને સડેલા ખાદ્ય પદાર્થ સહિતને લઇ મનપાની કાર્યવાહી
કરમસદ- આણંદ મહાનગરપાલિકાની આરોગ્ય વિભાગની ટીમો દ્વારા લોકોના જાહેર આરોગ્યને ધ્યાને લઇ છેલ્લા દસ મહિના દરમિયાન મહાનગરપાલિકા વિસ્તારની વિવિધ હોટેલ, રેસ્ટોરન્ટ, ખાણીપીણીના એકમોમાં જાહેર સ્વચ્છતા સંબંધિત આકસ્મિક તપાસ હાથ ધરવામાં આવી હતી.
મહાનગરપાલિકાના આરોગ્ય વિભાગની ટીમ, સેનેટરી ઇન્સ્પેક્ટર અને તેમની ટીમે દસ મહિનામાં ૨૦ દુકાનો, રેસ્ટોરન્ટમાં તપાસ કરી હતી. જેમાં સ્વચ્છતાનો સંદતર અભાવ, બગડેલો ખાદ્ય પદાર્થો અને ખાવાની ચીજોમાં ગંદકી જોવા મળી હતી. આ ૨૦ એકમોને કાયદાની જોગવાઇને આધિન જીપીએમસીની કલમ ૩૭૬ એ અંતર્ગત સીલ કરી અત્યાર સુધીમાં ૧૩.૧૫ લાખનો દંડ વસૂલ કરવામાં આવ્યો છે. જાહેર આરોગ્ય જોખમાતું હોવાથી અન્ય ૭ એકમો પાસેથી ૭.૧૯ લાખનો દંડ વસૂલ કરવામાં આવ્યો છે.
મહાનગરપાલિકા દ્વારા ખોરાકમાં ભેળસેળ અને સ્વચ્છતાના માપદંડોમાં કોઇપણ પ્રકારની બાંધછોડ ચલાવી લેવામાં આવશે નહીં. તેમજ લોકોના આરોગ્ય માટે જોખમી ખાદ્યપદાર્થો અને સ્વચ્છતાની અન્ય બાબતે હોટેલો, ખાણીપીણીના એકમો સામે તાત્કાલિક અસરથી કાયદાની જોગવાઇને આધિન કાર્યવાહી કરવામાં આવશે તેમ મહાનગર પાલિકા દ્વારા જણાવ્યું છે.
