વડોદરા: ચકચારી ભાયલી સામૂહિક દુષ્કર્મમાં કેસમાં છેલ્લી દલીલો કોર્ટ સમક્ષ રજૂ, 5 આરોપીની થઈ હતી ધરપકડ

વડોદરા: સમગ્ર ગુજરાતને હચમચાવી મુકનાર વડોદરાના ચકચારી ભાયલી ગેંગરેપ કેસની કાયદાકીય કાર્યવાહી હવે તેના અંતિમ પડાવ પર પહોંચી ગઈ છે. નવરાત્રી દરમિયાન બિલ રોડ પર સગીરા સાથે આચરાયેલા સામૂહિક દુષ્કર્મના આ ગુનામાં આજે સ્પેશિયલ પોક્સો કોર્ટ સમક્ષ બંને પક્ષો દ્વારા છેલ્લી અને ફાઇનલ દલીલો રજૂ કરવામાં આવી હતી. બંને પક્ષના વકીલોએ પોતપોતાના દાવાઓ મજબૂત કરવા માટે અદાલત સમક્ષ કલાકો સુધી દલીલોનો દોર ચલાવ્યો હતો.

આજની સુનાવણીમાં મુખ્યત્વે ડિજિટલ અને ઇલેક્ટ્રોનિક પુરાવા પર બંને પક્ષે દલીલો કરવામાં આવી હતી. સ્પેશિયલ સરકારી વકીલ શૈલેષ પટેલ અને મુખ્ય સરકારી વકીલ અનિલ દેસાઇએ તમામ પાંચેય આરોપીઓના મોબાઇલ ફોનની કોલ ડિટેઇલ રેકોર્ડ (સીડીઆર) અને ટેકનિકલ ડેટા ગુનાના સ્થળે તેમની હાજરીને મજબૂત રીતે પ્રસ્થાપિત કરે છે અને અગાઉ 45 સાક્ષીઓની જુબાની અને સીસીટીવી ફૂટેજ – આ તમામ પુરાવાઓ ગુનો સાબિત કરવા માટે સક્ષમ હોવાની દલીલો કરી હતી.

બીજી તરફ, બચાવ પક્ષના વકીલોએ સરકારી પક્ષના આ તમામ ટેકનિકલ દાવાઓ અને લોકેશનના પુરાવાઓને નકારવાનો પ્રયાસ કર્યો હતો. બચાવ પક્ષે અદાલતમાં એવી દલીલ કરી હતી કે ઘટનાના સમયે આરોપીઓનું વાસ્તવિક લોકેશન ગુનાના સ્થળથી ઘણું દૂર હતું. અત્રે ઉલ્લેખનીય છે કે, આ ગુનામાં પોલીસે મુન્ના અબ્બાસ બનજારા, મુમતાઝ ઉર્ફે આફતાબ, શાહરુખ કિસ્મતઅલી, સૈફઅલી બનજારા અને અજમલ બનજારાની ધરપકડ કરી હતી.

રાજ્ય સરકાર દ્વારા નીમેલા ખાસ સરકારી વકીલ તેમજ બે સરકારી વકીલ મળી કુલ ત્રણ વકીલોની ટીમ અને બચાવ પક્ષ વચ્ચે અગાઉ કોર્ટમાં કલાકો સુધી દલીલો ચાલી હતી. આ કેસમાં ક્રોસ વેરિફિકેશન, સાયન્ટિફિક પુરાવા અને આરોપીઓના ફર્ધર સ્ટેટમેન્ટ લેવાની તમામ કાનૂની પ્રક્રિયાઓ અગાઉ જ પૂરી થઈ ચૂકી હતી. અદાલતી સૂત્રોના જણાવ્યા અનુસાર, બંને પક્ષોની છેલ્લી દલીલો પૂર્ણ થઈ જતાં નજીકના દિવસોમાં આ કેસનો ચુકાદો આવશે તેમ જણાઈ રહ્યું છે. આ કેસમાં તમામ 45 સાક્ષીઓમાંથી એક પણ સાક્ષી હોસ્ટાઇલ જાહેર થયો નથી.